Sýret: qazdauiri.kz
Sondaı-aq bul aqparat taratýmen ǵana shektelmeıdi, sonymen qatar qoǵamda akademııalyq oılaý mádenıetin qalyptastyryp, feık aqparatpen kúresýge baǵyttalǵan. Alaıda, ókinishke qaraı, jýrnalıstıka ǵylym retinde áli kúnge deıin tolyq moıyndalmaı keledi. Bul – qazirgi medıa keńistiktegi úlken olqylyqtyń biri.
Osy máselege beıjaı qaramaǵan jastar elimizde jańa bastama kóterip, ǵylymı baǵytta belsendi jumysty bastady. Solardyń biri – L.N. Gýmılev atyndaǵy Eýrazııa ulttyq ýnıversıtetiniń stýdentteri. Munda jas zertteýshiler men bolashaq jýrnalısterge arnalǵan ǵylymı úıirme quryldy. Qazirdiń ózinde joba Jýrnalıstıka jáne áleýmettik ǵylymdar fakýltetiniń belsendi birlestigine aınalyp otyr. Atalǵan uıym – medıa salasynyń ózekti máselelerin tereń zerttep, bolashaq jýrnalısterdiń ǵylymı áleýetin arttyrady.
«Internettiń qarqyndy damýymen qatar medıa salasy da túrli transformasııaǵa tústi. Áli kúnge deıin jýrnalıstıka ǵylymy laıyqty baǵasyn almaı keledi. Ony ǵylymǵa aınaldyrý da óz qolymyzda. Bul úshin medıa salasyn jan-jaqty zertteýge den qoıýymyz kerek. Sondyqtan osy ortalyqty ashýdy sheshtik. Uıymnyń maqsaty – otandyq ǵylymı jýrnalıstıkany damytyp, medıany zertteý ádisterin meńgertý jáne uıymdy tuǵyrly zertteý ınstıtýtyna aınaldyrý», deıdi ǵalym, úıirme jetekshisi Gúlmıra Áshirbekova.
Ǵylymı úıirmeni ashý ıdeıasy atalǵan fakýltet stýdentterinen bastaldy. Olar ustazdary Gúlmıra Shaıtmaǵanbetqyzyna jýrnalıstıkanyń damýyna úles qosqysy keletinin aıtyp, ózderiniń usynystaryn jetkizgen. Búginde uıymnyń «Telegram» arnasy men áleýmettik jelilerde belsendi paraqshalary bar. Onda 100-ge jýyq stýdent, magıstrant jáne doktorant tirkelgen.
Gúlmıra Áshirbekovanyń aıtýynsha, ǵylymnyń tolyq aty – «Media research». «Research» – aǵylshynnyń zertteý degen sózi. Uıym medıanyń ózekti máselelerin zertteýge qyzmet etetindikten atyn osylaı qoıýdy jón kórgen.
Búginge deıin birlestik birneshe forsaıt-sessııa men jıyndar ótkizdi. Oǵan shetelden jáne elimizden belgili mamandar shaqyryldy.
Qazirgi tańda AQSh, Ulybrıtanııa, Germanııa, Fransııa, Japonııa osy salanyń kóshbasshylary bolyp otyr. Bul memleketterde ǵylymı jýrnalıstıka – arnaıy bilim beriletin, zertteý júrgiziletin, qoǵam suranysyna ıe sala. Elimizde bul baǵyt áli jańa, degenmen osyndaı bastamalar arqyly ol da óz jolyn tabary anyq.
Farıza IZBASAROVA,
L.N.Gýmılev atyndaǵy Eýrazııa ulttyq ýnıversıtetiniń stýdenti
