Senat tóraǵasy Máýlen Áshimbaev is-sharaǵa qatysýshylarǵa iltıpat bildirip, Palata sarapshylar qaýymdastyǵymen yntymaqtasa jumys istep kele jatqanyn aıtty. Sonyń nátıjesinde bes jyl boıy osy baǵytta múddeli taraptarmen birlesken júıeli bastama iske asyrylyp keledi. Senat spıkeri atap ótkendeı, kezekti jınaqtyń jaryq kórýi – «Taldaý mektebi» aıasynda atqarylǵan toptyq jumystyń jalǵasy jáne naqty nátıjesi.
«Osy jınaqtan keıin «Taldaý mektebiniń» tórtinshi legine qatysýshylar ózderin tek túlekter retinde emes, sonymen qatar sheshim qabyldaıtyn azamattarǵa jáne el damýynyń ózekti máselelerine qyzyǵýshylyq tanytatyn keń aýdıtorııaǵa qoljetimdi tolyqqandy saraptamalyq basylymnyń avtorlary dep ataı alady. Senat janyndaǵy Sarapshylar klýby men «Taldaý mektebi» – elimizdiń zııatkerlik áleýetin qalyptastyryp, nyǵaıtýǵa qosqan bizdiń úlesimiz. Osyndaı bastamalar arqyly Prezıdent Qasym-Jomart Toqaev jarııalaǵan «Adal azamat» tujyrymdamasynyń negizgi qundylyqtaryn dáripteımiz. Olar – bilim, azamattyq ósý, patrıotızm jáne qoǵam múddesine qyzmet etýge daıyn bolý», dedi M.Áshimbaev.
Is-shara barysynda Senat janyndaǵy «Taldaý mektebi» barshaǵa qoljetimdi ashyq bilim platformasy ekeni atap ótildi. Sondyqtan kez kelgen adam jobanyń YouTube arnasyna jarııalanǵan beıneler arqyly barlyq kezeńdegi dáristermen tanysa alady.
«Biz búgingi jáne buǵan deıin jaryq kórgen barlyq materıaldar jınaǵyn Parlament depýtattaryna, salalyq memlekettik organdarǵa, taldaý ortalyqtaryna, ýnıversıtetterge joldaımyz. Sondaı-aq ashyq jarııalaımyz. Osy rette bul eńbek joba aıasynda daıyndalǵan úshinshi ujymdyq saraptamalyq zertteý ekenin atap ótken jón. Osylaısha, Mektep tyńdaýshylary praktıkada qoldanýǵa arnalǵan naqty qoǵamdyq taldaýǵa qatysty. Búgin tanystyrylǵan zertteý memlekettik ınstıtýttardyń jumysyna, zańnamalyq qyzmetke jáne sarapshylar qoǵamdastyǵynyń jobalaryna óz paıdasyn tıgizedi dep senemin», dep M.Áshimbaev kezdesýge qatysýshylarǵa jobaǵa qoldaý bildirgenderi úshin alǵys aıtty.
«Taldaý mektebiniń» tórtinshi leginde 14 komanda jasaqtaldy. Olar bilim berý isindegi ınklıýzııa, genderlik teńgerim, jasyl energetıkany damytý, eńbek kóshi-qon máseleleri, óńdeýshi ónerkásipti órkendetý, zań shyǵarý qyzmetinde jasandy ıntellektini qoldaný jáne Ortalyq Azııadaǵy ornyqty damý sııaqty negizgi 7 baǵyt boıynsha jumys istedi.
Eldiń ornyqty damý máselelerin talqylaý kezinde sarapshylar ınklıýzıvti bilim berý isinde sıfrlyq sheshimderdi jáne Qazaqstannyń ekonomıkalyq ósý faktory retinde áıelderdiń áleýetin júzege asyrýdyń túrli joldary men formattaryn usynatyn birlesken jobalar ázirleý jóninde sóz qozǵady. Sondaı-aq energetıka, óńdeý ónerkásibi, medısına, sıfrlandyrý, klımattyq kún tártibimen birge negizgi salalardy da damytýǵa qatysty boljamdar usynyldy.
Jınaqty tanystyrý rásiminde «Astana» halyqaralyq qarjy ortalyǵynyń basqarýshysy Renat Bekturov, Prezıdent janyndaǵy Qazaqstannyń strategııalyq zertteýler ınstıtýtynyń bas ǵylymı qyzmetkeri Sanat Kóshkimbaev, ekonomıst, DESHT taldaý ortalyǵynyń basshysy Qýanysh Jaıyqov jáne taǵy basqa sarapshylar sóz sóılep, óz usynystaryn jetkizdi.
