Foto: Eńbek jáne halyqty áleýmettik qorǵaý mınıstrligi
Búginde áleýmettik ınspektorlardyń qyzmeti oń nátıje berip otyr. Máselen, Eńbek jáne áleýmettik qorǵaý mınıstrliginiń resmı málimetterine sáıkes, 2025 jyldyń basynan beri áleýmettik ınspektorlar 430 tekserý júrgizgen. Onyń 201-i jospardan tys, 99-y profılaktıkalyq baqylaý sheńberinde, 130-y prokýratýranyń talabymen júrgizildi. Tekserý barysynda anyqtalǵan buzýshylyqtardy joıý týraly 192 uıǵarym berildi, 28,8 mln teńgeden astam somaǵa 341 aıyppul salyndy.
Memlekettik baqylaýmen 17 ákimdik, 86 jergilikti atqarýshy organdardyń bólimderi men basqarmalary, 47 memlekettik mekeme, 16 balabaqsha, 52 mektep, 9 kolledj, lıseıler, 21 aýrýhana, emhanalar, 18 arnaýly áleýmettik qyzmet kórsetý ortalyqtary, 33 avtobýs parkteri, avto/temir jol vokzaldary, áýejaılar, 34 dúken, 5 saýda úıleri, 11 kafeler, meıramhanalar, qonaq úıler, 1 polısııa pýnkti, 5 stomatologııa, 1 kitaphana, 7 mádenıet úıleri, 2 arhıvter men mýzeıler, 3 sanatorıı, 2 poshta qyzmeti bólimshesi, 10 sport mektepteri, 1 notarıýs, 6 bank, 2 ońaltý ortalyǵy, ózge de 23 nysan qamtyldy.
Bir ǵana mysal, Halyqty áleýmettik qorǵaý salasyndaǵy retteý jáne baqylaý komıtetiniń Pavlodar oblysy boıynsha departamenti jeke tulǵanyń ótinishi negizinde «Pavlodar oblysynyń jumyspen qamtýdy úılestirý jáne áleýmettik baǵdarlamalar basqarmasy» MM-ne komıssııanyń qabyldaý tártibin saqtaýy, Áleýmettik qyzmetter portalynda jetkizýshilerdi tirkeý, tirkeýden shyǵarý máselesi jóninde jospardan tys tekserý júrgizdi. Tekserý qorytyndysy boıynsha sýbektige uıǵarym shyǵaryldy. Bul rette, áleýmettik ınspektorlardyń aıtýynsha, óńirde múgedektigi bar adamdarǵa áleýmettik ınfraqurylymdy beıimdeýde oń ózgerister bar. Muny erekshe qajettilikteri bar adamdar da rastap otyr.
«№3, №4 qalalyq emhanalardyń aýmaǵynda múgedekterge arnalǵan kólikter turaǵy bar, kireberis pandýstarmen jabdyqtalǵan. Emhana ǵımarattarynyń kireberisine kózi nashar kóretinder úshin mnemoshemalar, ǵımarattardyń ózinde taktıldi jolaqtar, múmkindigi shekteýli jandarǵa arnalǵan sanıtarlyq-turmystyq bólmeler qarastyrylǵan. «Baıantaý» sport saraıy, «Avtomobılıst» sport kesheni, «Olimpic» basseıninde erekshe qajettilikteri bar adamdardyń sportpen shuǵyldanýyna barlyq jaǵdaı jasalǵan», deıdi Pavlodar qalasynyń turǵyny, birinshi toptaǵy múgedek Iýlııa Petrýseva.
Aıta ketý kerek, profılaktıkalyq baqylaýdy júzege asyrý barysynda alǵashqy buzýshylyq anyqtalǵan jaǵdaıda menshik ıelerine aldymen olardy joıý týraly uıǵarym shyǵarylady. Belgilengen merzimde uıǵarym joıylmaǵan jaǵdaıda, sot tártibimen aıyppul salý júzege asyrylady.
