M.Áshimbaev oblystyń máslıhat depýtattarymen kezdesýde Memleket basshysy bastamashy bolǵan reformalardyń iske asyrylýyn zańnamalyq turǵydan sapaly qamtamasyz etý úshin palata men jergilikti ókildi organdardyń ózara is-qımylyn odan ári arttyrý mańyzdy ekenin atap ótti. Prezıdent óz Joldaýynda jáne barlyq deńgeıdegi máslıhattar depýtattarynyń II respýblıkalyq forýmynda oblystardy órkendetý, ekonomıkany ártaraptandyrý, óńdeý ónerkásibi men aýyl sharýashylyǵyn damytý úshin tıisti jaǵdaı jasaý qajettigine erekshe nazar aýdardy.
Senat tóraǵasy atap ótkendeı, Jambyl oblysy – qazirgi tańda ekonomıkasy turaqty ósip kele jatqan óńirlerdiń biri. Aımaqtyń osyndaı áleýetin belsendi iske asyrý jolynda depýtattar men jurtshylyq birlesip kúsh jumyldyrýǵa tıis. Bul rette ónerkásiptik óndiristi ulǵaıtýǵa, shaǵyn jáne orta bıznesti damytýǵa baǵyttalǵan tetikter men jobalar aıryqsha mánge ıe.
«Prezıdent Qasym-Jomart Toqaev ınvestısııa tartýǵa jáne jańa tehnologııany engizýge qatysty naqty mindetter júktedi. Osy basymdyqtardy júzege asyrý aıasynda búginde óńirlerde jańa kásiporyndar iske qosylyp, jumys oryndary ashylyp jatyr. Qazirgi tańda Jambyl oblysynda óńdeýshi ónerkásip, aýyl sharýashylyǵy, shaǵyn jáne orta bıznes, áleýmettik ınfraqurylym sııaqty mańyzdy salalar serpindi damyp keledi. Densaýlyq saqtaý jáne bilim berý nysandary salynyp, basqa da baǵyttarda júıeli jumys júrgizilip jatyr. Senat aldaǵy ýaqytta Jambyl oblysynan saılanǵan jáne basqa da depýtattarmen birge óńirdiń jan-jaqty damýyna qoldaý kórsete beredi», dedi palata spıkeri.
Sonymen qatar M.Áshimbaev Senat zań shyǵarý qyzmetine máslıhat depýtattaryn belsendi jumyldyrýǵa, óńirlerdegi ózekti problemalardy sheshýge járdemdesýge basa mán berip otyrǵanyn tilge tıek etti. Osyǵan baılanysty palata jergilikti ókildi organdarmen birneshe baǵyttaǵy tyǵyz jumysty ári qaraı jalǵastyra beredi. Senat tóraǵasy ózara is-qımyldy odan ári nyǵaıtý úshin ortaq kúsh-jiger men keshendi tásilderdi qajet etetin aldaǵy negizgi mindetterge de toqtalyp ótti.
«Senattyń Jergilikti ókildi organdarmen ózara is-qımyl jasaý jónindegi keńesiniń keńeıtilgen otyrysynda Prezıdent Qasym-Jomart Toqaev belgilep bergen mindetter talqylanyp, máslıhattardy odan ári nyǵaıtý máseleleri qaraldy. Jalpy, máslıhatar óńirlerdi damytý jáne Memleket basshysynyń reformalaryn iske asyrý jolyndaǵy mańyzdy ınstıtýttardyń biri bolýǵa tıis. Azamattarymyzdyń ómir súrý sapasyn jaqsartý jáne elimizdiń damýyna jaǵdaı jasaý – bizdiń ortaq maqsatymyz. Osy jolda sizderdiń ıdeıalaryńyz ben usynystaryńyz zań shyǵarý úderisin jetildirýge eleýli úles qosyp, óńirlerdi órkendetýge qatysty máselelerdi tıimdi sheshýge yqpal etedi dep senemin», dedi M.Áshimbaev.
Sapar aıasynda senatorlar Jambyl oblysynyń daryndy jáne belsendi jastarymen júzdesti. Onda Prezıdent bastamasymen iske asyrylyp jatqan jastardy qoldaýǵa arnalǵan ulttyq baǵdarlamalar men zańnamalyq sharalar áńgimege arqaý boldy. M.Áshimbaev óz sózinde jas býynnyń eldi jańǵyrtýda eleýli ról atqaratynyn aıtyp, qazirgi tańda jańa kózqarastar, ǵylymı izdenister, til úırený, zamanaýı sıfrlyq tehnologııalardy zerdeleý, jasampaz qundylyqtar men progressıvti ıdeıalardy sińirý asa mańyzdy ekenine nazar aýdardy.
«Biz qazir bilim jáne ǵylym zamanynda, ınnovasııalyq tehnologııalar men tyń jańalyqtar dáýirinde ómir súrip jatyrmyz. Osy kezeńde elimizde ózin-ózi damytýǵa, jańa daǵdylardy meńgerýge, qabiletti shyńdaýǵa, bilim kókjıegin keńeıtýge, onyń ishinde onlaın-oqýǵa barlyq jaǵdaı jasalǵan. Mundaı múmkindikti qur jibermeý kerek. Sondaı-aq jeke tulǵa retinde qalyptasýdyń taǵy bir mańyzdy tetigi – durys qundylyqtardy boıǵa sińirý. Prezıdent Qasym-Jomart Toqaev usynǵan «Adal azamat» tujyrymdamasy osyndaı qaǵıdattarǵa taban tireıdi. Sondyqtan, eń aldymen, materıaldyq emes, ıntellektýaldyq kapıtal jınaýǵa kúsh jumsap, úzdiksiz bilim alýdy ádetke aınaldyrý qajet», dedi M.Áshimbaev.
Senat tóraǵasy palatanyń jastardy qoldaý baǵytyndaǵy jumystary jóninde de aıtyp ótti. Bul rette jas belsendi azamattardy memlekettik basqarý salasyna tartýdyń jáne tıisti jobalar men zańnamaǵa ózgerister engizý arqyly olardyń áleýetin arttyrýdyń mańyzy zor ekeni anyq. Kezdesýde Senat janyndaǵy Sarapshylar klýby men «Taldaý mektebi» sııaqty qoǵamdyq jobalar osy maqsatty kózdeıtini aıtyldy.
Sonymen qatar palata spıkeri oblystyq áleýmettik ońaltý ortalyǵyna baryp, onyń qyzmetimen tanysty. Munda 18 jastan asqan birinshi jáne ekinshi toptaǵy múgedektigi bar adamdarǵa jáne qarttyǵyna baılanysty ózine qyzmet kórsete almaıtyn jandarǵa tıisti jaǵdaı jasalǵan.
О́ńirge sapar barysynda Senat depýtattary Baızaq aýdanynda ornalasqan «Meıirim» balabaqshasyna da bardy. Aýyl turǵyndarynyń ómir súrý sapasyn arttyrýǵa arnalǵan «Aýyl amanaty» baǵdarlamasyn iske asyrý aıasynda jabdyqtalǵan nysan 25 adamdy jumyspen qamtýǵa múmkindik berdi. Búginde atalǵan balabaqshaǵa aýyldaǵy 125 bala barady.
Senatorlar «JS GLASS» shyny zaýytynyń jáne aýyl sharýashylyǵyna arnalǵan ftorsyzdandyrylǵan fosfat óndiretin «Mıneraldy tyńaıtqyshtar» kásipornynyń ujymdarymen de kezdesti.
