Aımaq máselelerin nazarǵa aldy

Senator Serik О́teshov Qaraǵandy oblysynda jergilikti ózin-ózi basqarýdy damytý jáne aýyl medısınasyn jańǵyrtý máselelerine arnalǵan birqatar kezdesý ótkizdi. О́ńirdegi aýdan­dyq aýrýhanalardyń bas dári­gerlerimen kezdesken depýtat aýyldyq den­saýlyq saq­taýdy jańǵyrtý jónin­degi ulttyq jobanyń oryndalý barysyn talqylady. О́ńirge ınfra­­qurylymdy jańartý, feldsherlik-akýsherlik pýnktter jáne FAP kezinde dárihana pýnkt­terin qurý qajet. Oǵan qosa maman tapshy, dárigerlerge baspana jetispeıdi.

Al senatorlar Sultanbek Mákejanov pen Nurtóre Júsip jańadan salynyp jatqan «Abaı ınnovasııalyq mektebiniń» qury­lysymen tanysty. Olar qurylys alańynda jergilikti atqarýshy organ men merdiger uıym ókilderimen jobany iske asyrý barysy men aldaǵy jumys kezeńderin talqylady. N.Júsiptiń aıtýynsha, eń bastysy mektep salý emes, bolashaqqa berik negiz qalap, elimizdiń zııatkerlik áleýeti damı túsetin keńistik qurý bolyp otyr.

Senator Janna Asanova da Almatyda medısınalyq mekemeler, bıznes-qoǵamdastyq jáne jurtshylyqpen birqatar kezdesý ótkizdi. Ol áleýmettik qorǵaý, ınklıýzıvti qoǵam jáne halyqtyń jappaı nesıe alýyn azaıtý, ekologııa, ýrbanıstıka máselelerine toqtaldy.

Olga Perepechına men Ásem Rahmetova Qostanaıǵa saparlady. Depýtattar oblys ákimi Ǵaýez Nurmuhambetovpen kezdesip, ınvestısııalyq jobalardy iske asyrý máselelerin, halyqty áleýmettik qoldaý sharalaryn talqylady. Sondaı-aq olar Aqqaıyń aýdanynda bolyp, Lenınskoe aýylyndaǵy eldi meken ishindegi joldardy jóndeý barysymen tanysty, sondaı-aq «Oqjetpes» balalar jazǵy lagerin kórdi.

Janbolat Jórgenbaev pen Zakırjan Kýzıev sý resýrs­tary jáne ırrıgasııa mınıstriniń orynbasary Erbolat Ibraıha­nov­pen birge Jetisý oblysyna attanyp, Panfılov aýdanynda sý sharýashylyǵy salasyndaǵy ınfraqurylymdyq jobalardy iske asyrý barysymen tanysty. Onda jańa úsh sý qoımasynyń qurylysy josparlanyp otyr. Qazir osy nysandar boıynsha memlekettik saraptamadan ótetin tehnıkalyq-ekonomıkalyq negizdemeler ázirlenip jatyr. J.Jórgenbaevtyń aıtýynsha, osy sý qoımalary paıdalanýǵa berilgende, Panfılov aýdanynyń 42,6 myń gektar jerin turaqty sýmen qamtamasyz etýge múmkindigi bar.

Sonymen qatar depýtattar Álı Bektaev pen Murat Qadyrbek Saryaǵash aýdanynyń turǵyndarymen kezdesti. Onda shaǵyn jáne orta bıznesti damytý, qaldyqtardy qaıta óńdeý jáne agroónerkásip sektorynyń máseleleri sóz boldy. Senatorlar polıetılen qaldyqtaryn qaıta óńdeýmen jáne plastık ydys­tardy shyǵarýmen aınalysatyn «Amantayplast» kompanııasynyń jumysymen de tanysty. Kásip­oryn­da táýligine 4 tonnaǵa deıin qaldyq óńdeledi, olardan 10 myń qorap jasalady.

Depýtattar sondaı-aq 2015 jyldan bastap zamanaýı agrotehnologııany paıdalana otyryp, 1,4 gektarǵa kókónis ósirilip jatqan jylyjaı kesheninde boldy. Olar kásipkerlermen jáne aýyl sharýashylyǵy ónimderin óndirýshilermen kezdesýde jer­gilikti jerlerde bıznes júr­gizý kezinde týyndaıtyn ózekti máse­le­ler­ge qanyqty.

Depýtattar óńirlerde qorda­lan­ǵan máseleler baqylaýǵa alynyp, Parlamentte talqylanatynyna ýáde berdi.