Qýatty keme Kaspııge attanbaq

Oral «Zenıt» zaýyty óziniń sý jańa kemesiniń tusaýyn kesip, ony sýǵa túsirý rásimin ótkizdi. Aıbyny asqaq sharaǵa elimizdiń Áskerı-teńiz kúshteri salasynyń qyzmetkerleri men zaýyt jumysshylary jáne qala turǵyndary jınaldy. Táýelsizdikke qol jetken jyldardan bastap «Zenıt» zaýyty elimizdegi keme óndirisi salasynyń kóshbasshysy atandy. Kaspıı teńizindegi shekara tynyshtyǵyn kúzetýge attanatyn zenıttikter shyǵarǵan 23-shi keme. Bul kemeniń ereksheligi sý betinde úzdiksiz 3-5 táýlikke deıin, saǵatyna 100 shaqyrym jyldamdyqpen júze alady. Sonymen qatar, álemdik keme jasaýdaǵy barlyq tehnologııalar eskerilgen, qarýy da qýatty. Tez qozǵalyp, kúrt buryla alatyn «FC-19» kemesiniń kúshimen teńiz shekarasyn buzýshylar men zańsyz balyq aýlaýshy talaı qylmyskerdiń quryqtalary sózsiz ekendigin aıtady sala mamandary. – Teńiz tynyshtyǵy, ondaǵy tártipti qadaǵalaý berik qolda ekendigine nyq senimdimiz. Búgingi kúni memleketimizdiń aıbynyn, qýatyn shyn máninde arttyratyn, týǵan óńirimiz úshin keýdemizde maqtanysh sezimin uıalatatyn taǵy bir tarıhı oqıǵanyń kýási bolǵaly otyrmyz. Táýelsiz elimizdiń tynyshtyǵyn kúzetýge zor úlesterin qosyp júrgen «Zenıt» zaýyty qyzmetkerlerine alǵys aıtamyn. Búgingi sýǵa túsirilgeli otyrǵan kememen ondaǵy shekarashylarǵa sát sapar, aq jol tileımin, – dedi quttyqtaý sózinde Batys Qazaqstan oblysy ákiminiń birinshi orynbasary Arman О́teǵulov. Saltanatty sharada sóz alǵan áskerı-teńiz salasy qyzmetkerleri men zaýyt basshylyǵy da kemege sátti sapar tiledi. Budan soń kelgen qonaqtar sýǵa túsirilgen kemeni aralap kórdi. Nurbek ORAZAEV, jýrnalıst. Temir QUSAIYN, «Egemen Qazaqstan». ORAL. Sýretti túsirgen Medet DOSYMOV.