Senatorlar Súıindik Aldashev pen Bekbol Orynbasarov Mańǵystaý oblysyndaǵy Jańaózen qalasy men Túpqaraǵan aýdanynda bolyp, óńirlerdegi áleýmettik, ınjenerlik jáne óndiristik ınfraqurylymnyń qazirgi jaı-kúıimen tanysty. Olar ENI jáne «QazMunaıGaz» kompanııalarynyń birlesken jobasy – qýaty 247 MVt gıbrıdti elektr stansasynyń qurylysyn kórdi. Bul joba «О́zenmunaıgaz» AQ men jańa gaz óńdeý zaýytyn turaqty energııamen qamtamasyz etedi. Depýtattar sonymen qatar «Tenge Oil & Gas» JShS-niń óndiristik alańdarynda bolyp, gazdy qaıta óńdeýdi arttyrý josparymen tanysty.
Sondaı-aq senatorlar Túpqaraǵan aýdanynda sýmen qamtý, sport jáne bilim berý nysandaryn aralady. Olar Qyzylózen aýylynda aýyl turǵyndaryn aýyzsýmen qamtamasyz etip otyrǵan sý tartý torabynyń jumysyn kórdi. Fort-Shevchenko qalasynda táýligine 5 myń tekshe metr teńiz sýyn tushytatyn jańa stansa jumys isteıdi. Qurylysy aıaqtalǵan bul nysan Baýtın jáne Atash eldimekenderin sýmen qamtamasyz etedi.
Al depýtat Altynbek Nuhuly Pavlodar qalasynda kitaphana salasy men óńirdiń ındýstrııalyq áleýetin damytý máselelerine arnalǵan birqatar kezdesý ótkizdi. Ol kitaphanashylardy áleýmettik qoldaý, jalaqyny kóterý jáne «Kitaphana isi týraly» zańdy ázirleý jónindegi usynystar týraly aıtty.
«Kitaphana – tek kitap saqtalatyn mekeme emes. Bul ulttyń oıyn qalyptastyratyn rýhanı jáne ıntellektýaldy damý ortalyqtary. Myqty kitaphana júıesi bolmaıynsha sapaly bilim, mádenı sabaqtastyq jáne sanaly jastardy tárbıeleý týraly aıtý múmkin emes. Biz kitaphanashylarǵa, onyń ishinde zańnamalyq tetikter men áleýmettik qoldaý arqyly laıyqty jaǵdaı jasaýǵa mindettimiz», dep atap ótti senator.
Depýtat kitaphana qoryn qoldaý retinde mekemege 20 kitabyn tapsyrdy, sondaı-aq Qanysh Sátbaevtyń buryn syıǵa tartylǵan 10 tomdyq eńbegin sıfrlandyrý jáne elektrondyq nusqasyn kitaphanaǵa berý týraly memorandým jasasý qajettigin aıtty.
Senattyń Áleýmettik-mádenı damý jáne ǵylym komıtetiniń tóraǵasy Nurtóre Júsip Ǵumarbek Dáýkeev atyndaǵy Almaty energetıka jáne baılanys ýnıversıtetinde boldy. Ol energetıka jáne baılanys salasynyń bolashaq mamandaryna dıplom tabystaý rásimine qatysty.
Nurtóre Júsip túlekter aldynda sóılegen sózinde energetıka jáne telekommýnıkasııa búkil ekonomıkanyń jumysyn qamtamasyz etetin bazalyq salanyń biri ekenin atap ótti. Jedeldetilgen sıfrlandyrý, «jasyl» energetıkany damytý, smart-tehnologııany engizý jáne energetıkaǵa qajettilik ósken jaǵdaıda elimizge tehnıkalyq saýatty, ınnovasııalyq turǵyda oılaıtyn, qazirgi zamannyń qaýip-qaterine beıimdelgen ómirlik mańyzy bar jańa býyn ınjenerleri qajet.
«Árbir túlek – bolashaq «aqyldy» jelini ázirleýshi, jańartylatyn energııa kózine negizdelgen júıelerdi jobalaýshy, strategııalyq mańyzdy ınfraqurylymnyń kıberqaýipsizdigi boıynsha sarapshy. Olardyń bilimi men daǵdysy ónerkásipti damytýdyń, ekonomıkany sıfrlandyrýdyń, energııanyń tıimdiligi men turaqtylyǵyn arttyrýdyń qozǵaýshy kúshine aınalady. AEjBÝ shalǵaı jáne strategııalyq mańyzy bar óńirlerdi damytýdy qoldap keledi, negizgi memlekettik bastamalardy iske asyrý úshin kásibı kadrlardy qalyptastyrady», dedi senator.
Senator Olga Býlavkına Shyǵys Qazaqstan oblystyq máslıhatynyń kezekti 22-otyrysyna qatysty. Onda sóz sóılegen depýtat Senat depýtattary men jergilikti máslıhat ókilderiniń tıimdi ózara is-qımylynyń mańyzdylyǵyna toqtaldy. Onyń aıtýynsha, bul ortalyq pen óńirler arasyndaǵy baılanysty nyǵaıtýǵa, aýmaqtardyń turaqty jáne teńgerimdi damýyn qamtamasyz etýge múmkindik beretin túrli deńgeıdegi basqarý organdarynyń úılesimdi jumysy.
«Turaqty dıalogsiz jáne halyqpen keri baılanyssyz kúshti ókildi bılik múmkin emes. Senat basqalarmen qatar, jergilikti jerlerden túsken ótinishter negizinde qalyptasatyn zań shyǵarý bastamalarymen belsendi jumys istep jatyr», dedi O.Býlavkına.
