Oljas Bektenov Memleket basshysy Qasym-Jomart Toqaevtyń azamattyq avıasııany damytýǵa jáne áýe kóliginiń jolaýshylardyń barlyq sanatyna qoljetimdi bolýyna kóp kóńil bóletinin atap ótti. Jańa áýejaılar men áýeaılaqtardy salý jáne jumys istep turǵan áýejaılardy jańǵyrtý asa mańyzdy.
Elimizde júrgizilgen qurylymdyq jáne zańnamalyq reformalar salany brıtandyq model boıynsha damytý úshin jaǵdaı jasady. Qazaqstannyń avıasııa salasynyń ICAO standarttaryna sáıkestik deńgeıi 2009 jylǵy 47%-dan bıyl 82%-ǵa deıin ósti, bul kórsetkish Polsha, Chehııa, Danııa sııaqty jáne taǵy da basqa Eýropa memleketteriniń jaǵdaıymen salystyryla jasaldy.
«Biz halyqaralyq azamattyq avıasııa uıymymen ózara is-qımylǵa tereń mán beremiz jáne ekijaqty yntymaqtastyǵymyzdy avıasııa salasyn damytýdy qamtamasyz etýdegi strategııalyq basymdyq retinde qarastyramyz», dep atap ótti O.Bektenov.
О́z kezeginde Halyqaralyq azamattyq avıasııa uıymy keńesiniń Prezıdenti Salvatore Shakkıtano Qazaqstanda azamattyq avıasııany damytý boıynsha júrgizilgen jumystarǵa oń baǵa berip, elimizben yntymaqtastyqty odan ári nyǵaıtýǵa múddeli ekenin bildirdi.
«Qazaqstanda keıingi birneshe jylda avıasııa sektorynda aıtarlyqtaı ilgerileý baıqalady. Júıe qalypty jumys isteıdi, eldiń kórsetkishteri ortasha jahandyq kórsetkishten joǵary. Biz eldiń avıasııa salasyn odan ári damytýǵa daıynbyz. ICAO basymdyqtarynyń biri – Turaqty damý maqsattary kontekstinde kólikti damytýdy qoldaý. Shyǵaryndylardyń nóldik deńgeıine jetý úshin biz turaqty «jasyl» otyndy kóbirek paıdalanýymyz kerek. Osy baǵytta birlesip jumys isteýge daıynbyz», dep atap ótti S.Shakkıtano.
Kezdesý qorytyndysy boıynsha taraptar seriktestik baılanystardy jan-jaqty damytý jáne tereńdetý nıetterin rastady.
