Mýzeıge kirgen sátten-aq kózdiń jaýyn alatyn mıneraldar álemi qarsy alady. Ekspozısııada krıstaldar, mıneraldar, baǵaly mıneraldardyń, taý jynystary men paleontologııalyq qaldyqtardyń biregeı úlgileri bar. Bul jádigerler tabıǵattyń sheksiz qudiretin kórsetip, ǵylym men ónerdiń úndestigin tanytady.
Mýzeıde sırek kezdesetin mıneraldardy, túrli geologııalyq dáýirlerge tıesili taý jynystaryn, baǵaly jáne jartylaı baǵaly tastardy, jarqyraǵan asyl buıymdardy tamashalaýǵa bolady. Eń erekshe jádigerlerdiń biri – Mendeleev kestesindegi barlyq elementi bar mıneraldar toptamasy. Sondaı-aq murajaı sórelerinen paleontologııalyq qaldyqtardy, HIH ǵasyrdan beri saqtalǵan sırek geologııalyq kitaptardy, ótken ǵasyrlarda qoldanylǵan dala geologteriniń qural-saımandaryn kórýge bolady. Bul jádigerler bir kezderi jer qoınaýyn zerttegen ǵalymdardyń izdenisterinen syr shertedi.
Oljabaı Jumaǵalıulynyń aıtýynsha, mýzeıge jyl saıyn myńdaǵan adam keledi. Olardyń qatarynda sheteldik týrıster, ǵylymı zertteý ortalyqtarynyń mamandary, depýtattar, sondaı-aq Mádenıet jáne aqparat, Ǵylym jáne joǵary bilim mınıstrleri de bar. Degenmen mýzeıdiń basty qonaqtary – mektep oqýshylary, kolledj stýdentteri jáne joǵary oqý oryndarynyń jastary. Mýzeıdi salǵandaǵy basty oı – balalar kelip kórsin, oqysyn, erteń geolog mamandyǵyna qyzyǵyp, eldiń baılyǵyn qalaı izdeý keregin bilsin degen nıet. Bul jas urpaqtyń tabıǵatqa, ǵylymǵa degen súıispenshiligin oıatyp, týǵan jerdiń baılyǵyn baǵalaýǵa úıretedi. Mundaǵy árbir mıneral men taý jynysy – Otanymyzdyń san ǵasyrlyq geologııalyq tarıhynyń bir bólshegi jáne baılyǵymyzdyń kórinisi.
Búgingi tańda Mıneralogııalyq mýzeıde úsh myńnan astam eksponat bar. Bul san jyl saıyn artyp keledi. Ǵalymdar jer qoınaýyndaǵy paıdaly qazbalardyń bir kúni sarqylatynyn aıtady. Sondyqtan mundaı murajaılar mıneraldardyń sırek úlgilerin saqtap qalýǵa, olardy bolashaq urpaqqa mura etip jetkizýge múmkindik beredi. Mýzeı – ǵylymı oryn ǵana emes, sondaı-aq elimizdiń baılyǵyn kórsetetin rýhanı jáne mádenı ortalyq. Onyń árbir tasy – jer qoınaýyndaǵy san alýan baılyqtyń aıǵaǵy. Murajaı kelýshilerge tabıǵattyń ǵajaıyp syryn ashyp qana qoımaı, týǵan jerge degen súıispenshilikti arttyratyn erekshe oryn bolyp qala bermek.
Alaıda mýzeıdiń qazirgi ǵımaraty tar jáne ekspozısııalardy tolyq kórsetýge múmkindik bermeıdi. Oljabaı Jumaǵalıuly birneshe ret memleket tarapynan qoldaý kórsetý týraly ótinish bildirgenimen, áli kúnge deıin naqty jaýap almaǵan. Mýzeıge keń ǵımarat qajet, bul másele boıynsha Memleket basshysy tapsyrma bergenimen, áli oryndalmaǵan. Bul mýzeıdiń damýyna jáne kelýshilerge qolaıly jaǵdaı jasaýǵa kedergi keltirip otyr.
Mıneralogııalyq mýzeı – elimizdiń mádenı jáne ǵylymı murasynyń mańyzdy bóligi. Onyń saqtalýy men damýy úshin memleket tarapynan qoldaý kórsetý qajet. Bul bolashaq urpaqqa tabıǵat ǵajaıyptaryn tanyp-bilýge múmkindik beretinine senimdimin.
Erlan KIIKBAI,
jýrnalıst
