Foto: QazAqparat
Talqyǵa premer-mınıstrdiń orynbasary – ulttyq ekonomıka mınıstri Serik Jumanǵarın, sıfrlyq damý, ınnovasııalar jáne aeroǵarysh ónerkásibi mınıstri Jaslan Mádıev, eńbek jáne halyqty áleýmettik qorǵaý mınıstri Svetlana Jaqypova, qarjy mınıstri Mádı Tákıev jáne beıne konferensııa baılanysy arqyly ishki ister mınıstri Erjan Sádenov, memlekettik qyzmet isteri agenttiginiń tóraǵasy Darhan Jazyqbaı qatysty.
Búgingi tańda elimizde aınalymǵa 257,5 mlrd sıfrlyq teńge shyǵarylǵan. Ulttyq bank tóraǵasy Tımýr Súleımenov platforma qazir tájirıbelik-ónerkásiptik paıdalaný kezeńinde, aldaǵy jeltoqsan aıynda ony tolyqqandy iske qosylatynyn aıtty.
Ulttyq banktiń sıfrlyq transformasııalaý jetekshisi Bınur Jalenov sıfrlyq teńge búginde onnan astam baǵyt boıynsha synalǵanyn baıandady. Atap aıtqanda, sıfrlyq QQS salyqty qaıtarý merzimin 75-ten 5 jumys kúnine deıin qysqartýǵa múmkindik týǵan. Joldardy jóndeýge arnalǵan qarajatty tańbalaý «Pavlodar – Atyraý» jáne «Muqyr – Qulsary» jobalarynda synalǵan. Sondaı-aq «Dostyq – Moıynty» temir jolynyń jáne «Taldyqorǵan – Úsharal» gaz qubyry ýchaskesiniń qurylysyn qosa alǵanda, Ulttyq qordan qarjylandyrylatyn jobalarǵa bólingen qarjynyń maqsatty jumsalýyn baqylaý úshin de paıdalanylyp jatyr. Aldaǵy ýaqytta «Beıneý – Bozoı – Shymkent» gaz qubyryn, gaz bólý kesheni jáne «Baqty – Aıagóz» temirjol ýchaskesi sııaqty jobalardy júzege asyrý josparlanǵan. Budan basqa, «Aýyl amanaty» shaǵyn nesıeleý baǵdarlamasy aıasynda qarajatty ýaqytsha buǵattaý tetigi synaqtan sátti ótken.
Sıfrlyq teńgeni engizý jyljymaıtyn múlik jáne avtokólik salasynda mámileler jasaý, mekteptegi tamaqtaný, qymbat taýarlardy satyp alý, agroónerkásiptik keshendegi memlekettik nesıeleý quraldary sııaqty basqa da baǵyttarda pysyqtalyp jatyr.
Jıynda sondaı-aq normatıvtik-quqyqtyq bazany jetildirýge de nazar aýdaryldy. Búgingi tańda «Tólemder jáne tólem júıeleri týraly» Zańǵa, sıfrlyq shot uǵymyn jáne basqa da ilespe normalardy engizýdi qosa alǵanda, birqatar túzetýler daıyndalǵan.
Premer-mınıstr sıfrlyq teńgeniń negizgi artyqshylyqtaryn atap ótti.
«Memleket basshysynyń tapsyrmasyna sáıkes, sıfrlyq teńgeniń kómegimen aqshany tańbalaý jáne qadaǵalaý boıynsha pılottyq jobalar kezeń-kezeńimen júzege asyrylýda. Sıfrlyq teńge bıýdjet qarajatyn maqsatty paıdalanýda tolyq ashyqtyqty jáne júıeli baqylaýdy qamtamasyz etedi. Aqshany tańbalaýdy keńeıtýdi tıimdi júzege asyrý úshin aqparattyq júıelerdiń «Sıfrlyq teńge» platformasymen ýaqtyly ıntegrasııalanýyn qamtamasyz etý qajet. Sondaı-aq tıisti normatıvtik quqyqtyq bazany pysyqtaý talap etiledi. «Boıalǵan aqsha» tetigin engizý sapaly jáne tolyq kólemde júzege asyrylýy tıis. Jaqyn arada Ulttyq qor men bıýdjet esebinen qarjylandyrylatyn keminde júz iri jobany «sıfrlyq teńge» formatyna aýystyrýdy tapsyramyn», dedi Oljas Bektenov.
Jıyn qorytyndysy boıynsha Premer-mınıstr memlekettik organdarǵa Ulttyq bankpen jáne múddeli uıymdarmen birlesip, ekonomıkanyń jekelegen sektorlaryna sıfrlyq teńgeni keń kólemde jedel ıntegrasııalaý jónindegi Jol kartasyn ázirleýdi tapsyrdy.
