Senat tóraǵasynyń orynbasary Olga Perepechına men senator Ásem Rahmetova Soltústik Qazaqstan oblysyndaǵy Aıyrtaý jáne Aqjar aýdandarynda boldy. Olar aldymen Aıyrtaý aýdanyndaǵy Saýmalkól aýylynda sport stadıonynyń qurylysyn kórdi. Sondaı-aq Kýtýzovka aýylynda qurǵaq bıe sútin óndiretin fermanyń qurylys alańynda, Gornoe aýylynda orman tuqymbaǵynda boldy.
«Biz aýyldardy saqtaý men damytýǵa qajetti barlyq jaǵdaıdy jasaı otyryp, jaıly ahýal qalyptastyrýǵa kóńil bólýimiz kerek. Jastardyń jumys izdep qalaǵa ketýi – kúrdeli másele. Aýylda jumys oryndaryn ashý qajet. О́ıtkeni bul – tolyqqandy ómir súrýdiń negizi», dedi Á.Rahmetova.
O.Perepechına aımaqqa sapary barysynda Manash Qozybaev atyndaǵy Soltústik Qazaqstan ýnıversıtetiniń túlekterine dıplom tapsyrý saltanatty rásimine qatysty.
«Ár túlektiń óz kásibin taýyp qana qoımaı, týǵan ólkeniń jáne jalpy elimizdiń damýyna úles qosýyn tileımin. Igergen bilim men úırengen daǵdy tabysty eńbek jolynda berik negiz bolatyny sózsiz. Ýnıversıtet talaı kóshbasshylar men bilikti mamandardy daıarlap shyǵardy», dedi senator.
Al Senat depýtattary Sultan Dúısembınov, Ǵalıasqar Sarybaev, Amangeldi Tolamısov Jetisý oblysyndaǵy Kerbulaq aýdanynyń Qoǵaly aýylyndaǵy birqatar áleýmettik jáne ınfraqurylymdyq nysandy aralady.
Aýyl eńbekkerlerimen kezdesýde qurǵaqshylyq kezinde qoldaý sharalary, tehnıka jáne tyńaıtqyshpen qamtamasyz etý, sýarmaly sýǵa qol jetkizý máseleleri talqylandy. Turǵyndar sýbsıdııa júıesin jetildirý, jeńildetilgen nesıe berý baǵdarlamasynyń aýqymyn keńeıtý, bilikti agronomdar daıarlaý jóninde usynystaryn aıtty.
«Aýyl – bul óndiristik kúsh-qýat qana emes, elimizdiń turaqtylyǵynyń kepili. Aýyl eńbekkerlerin qoldaý jáne aýyldyq jerlerde ómir súrý jaǵdaıyn jaqsartý memlekettik saıasattyń mańyzdy mindeti bolyp qala beredi», dep atap ótti Ǵ.Sarybaev.
Depýtattar Lázzat Rysbekova men Arman О́teǵulov Batys Qazaqstan oblysyndaǵy Báıterek jáne Aqjaıyq aýdandarynda, sondaı-aq Oral qalasynda boldy. Senatorlar áleýmettik, ınfraqurylymdyq jáne óndiristik jobalardy iske asyrý barysymen tanysyp, óńirdi damytýdyń máselelerin jergilikti turǵyndarmen birge talqylady.
Depýtattar Makarovo aýylynda ótken jyldyń sońynda «Aýyl amanaty» baǵdarlamasy aıasynda iske qosylǵan jańa qus fabrıkasyna da bardy. Sondaı-aq Oktıabrskoe aýylynda kókónis ósirýmen aınalysatyn «Avgýst» sharýa qojalyǵynyń qyzmetimen tanysyp, kolleksııalyq baqty aralady. Baǵbandar 2024 jyldyń kóktemgi sý tasqyny aıtarlyqtaı zııan keltirgenin aıtty, baqtaǵy jemis aǵashynyń 80 paıyzy qýrap qalǵan. Senatorlar máseleni salalyq memlekettik organdarǵa jetkizýge ýáde berdi.
Nurlan Beknazarov, Aıgúl Qapbarova, Murat Qadyrbek Shymkent qalasynda Muhtar Áýezov atyndaǵy Ońtústik Qazaqstan ýnıversıtetiniń stýdentterimen jáne professor-oqytýshylar quramymen kezdesti.
«Senat aldaǵy ýaqytta da jastardyń múddesine, zańnamalyq bazany jetildirýge jáne qazirgi zamanǵy quqyqtyq memleketti qalyptastyrýǵa úles qosa bermek», dedi N.Beknazarov.
Sonymen qatar N.Beknazarov pen A.Qapbarova Shymkent qalasy boıynsha Sot saraptamasy ınstıtýtynda boldy. Senatorlar qyzmetkerlerdiń eńbek jaǵdaıyn, kadr saıasatyn jáne tehnıkalyq jaraqtandyrý máselelerin talqylady.
Senator Olga Býlavkına О́skemende qala turǵyndarymen kezdesip: «Azamattardyń jaqsy ómir súrýi jaıly qaladan bastalady. Halyqpen kezdesýler ótkizý jergilikti jerlerde asa ótkir problemalardy jedel túrde anyqtaýǵa jáne júıeleýge múmkindik beredi. Árbir ótinish boıynsha tıisti memlekettik organdarmen qajetti jumys júrgizilip, pysyqtalady. Onyń ishinde Parlament aralasýyn talap etetin máselelerde de bar», dep atap ótti.
