«Bıyl biz «Toraıǵyr-6» atty belgili eskertkishte qazba jumystaryn júrgizip, tas tóbeniń shyńyn zerttedik. Nátıjesinde «Toraıǵyr-7» jańa qorǵan anyqtaldy. Eki qorǵandy qazý barysynda biz saq dáýiriniń erte kezeńine jatatyn qola pyshaqtardy taptyq», – dedi Marǵulan ýnıversıtetiniń arheologııalyq qorlarynyń bas saqtaýshysy Elena Týsheva.
Zertteýshilerdiń aıtýynsha, bul - Pavlodar oblysynda tabylǵan eń kóne qola buıymdardyń biri.
«Pyshaqtar ejelgi tehnologııa ádisi arqyly qoladan quıylǵan. Biraq stılıstıkalyq jaǵynan erte temir dáýirine jatady. Bul aımaqta damyǵan metallýrgııalyq tehnologııalar men turaqty mádenı baılanystardyń bolǵanyn rastaıdy», – dedi Elena Týsheva.
Sondaı-aq arheologtar bul jerden Tasmola mádenıeti ókilderiniń qaldyqtaryn tapqan.
«Qańqa-súıekter jaqsy saqtalǵan. Bul jynys, jas jáne antropologııalyq sıpattamalardy anyqtaýǵa múmkindik berdi. Al tómengi qabatty tazartqan kezde biz kóne Andronov mádenıetine jatatyn qabirlerge tap boldyq», – dedi «Tarıh» baǵdarlamasynyń stýdenti Angelına Grıshenko.
Aıta keteıik, Marǵulan ýnıversıteti Baıanaýyl aımaǵynda 10 jyldan astam ýaqyt boıy zertteýler júrgizip keledi. Búginde oqý ordasy Baıanaýyldaǵy negizgi arheologııalyq eskertkishterdiń saqtalýyn qamtamasyz etedi.
