Nura aýdanynda depýtattar Bolat Ábdikárimov atyndaǵy kópsalaly kolledjge bardy. Oqý orny agroónerkásip, qurylys jáne óndiris salalaryna arnalǵan on mamandyq boıynsha kadrlar daıarlaıdy. Búginde munda shamamen 300 stýdent bilim alyp jatyr.
Májilis tóraǵasy pedagogterge arnaǵan sózinde Eńbek adamynyń róli memleket úshin mańyzdy ekenin atap ótti. Ol qazirgi tańda elimizde jumysshy mamandarǵa suranys 40 paıyzdan asyp otyrǵanyn aıtyp, osyǵan baılanysty jas, bilikti kadrlar daıarlaýǵa erekshe nazar aýdarý qajettigine toqtaldy.
– О́zderińizge belgili, Prezıdent osy jyldy Jumysshy mamandyqtary jyly dep jarııalady. Bul baǵytta kolledjder men ýchılısheler elge qajetti mamandar daıarlaý isinde erekshe ról atqarady. Sizder jas dánekerleýshilerge, qurylysshylar men tiginshilerge eńbekke degen shynaıy qurmetti, óz mamandyǵyna degen
súıispenshilikti jáne durys moraldyq qundylyqtardy darytyp kelesizder. Myqty ekonomıka men eldiń jarqyn bolashaǵy – ustazdardyń qolynda. Sondyqtan memleket sizderdi tolyq qoldaıdy. Kolledjderdi damytýǵa jáne muǵalimderdiń eńbek jaǵdaıyn jaqsartýǵa bar kúshin salady, – dedi E.Qoshanov.
Sonymen qatar ol eńbek adamyn qoldaýǵa baǵyttalǵan naqty ózgeristerge, ıaǵnı jumysshy mamandyq ıeleri úshin jańadan turǵyn úı ıpotekalyq baǵdarlamasynyń iske qosylǵanyn, sondaı-aq zııandy eńbek jaǵdaıynda jumys isteıtinderge zeınetke erte shyǵý múmkindigi qarastyrylǵanyn atap ótti.
Sapar barysynda depýtattar kolledj stýdentteri óz mamandyqtary boıynsha tájirıbelik mashyq qalyptastyratyn oqý sheberhanalarynyń jumysymen tanysty. Munda dánekerleý isi, qurylys, avtoslesar, tamaq jáne tigin óndirisi baǵyttary boıynsha bilim beriledi. Kolledjdegi jumys barysy týraly jas maman Araılym Amankeldi aıtyp berdi. Ol «Dıplommen – aýylǵa» baǵdarlamasy aıasynda týǵan aýylyna oralyp, muǵalim bolyp qyzmet atqaryp júr.
Depýtattar sondaı-aq medısına qyzmetkerlerine arnalǵan kóppáterli turǵyn úı kesheniniń kúrdeli jóndeý jumystaryn tekserdi. Bul úı buǵan deıin bos turǵan ǵımarattan qaıta jańǵyrtylyp jatyr. Jyl sońyna deıin jańa qyzmettik baspanaǵa aýdandyq aýrýhananyń jas qyzmetkerlerinen 14 otbasy qonystanady dep josparlanyp otyr. Aımaq basshylyǵynyń aıtýynsha, aýyldaǵy medısına qyzmetkerlerin qoldaýǵa baǵyttalǵan memlekettik qoldaý sharalary arqyly búginde Nura aýylynda bilikti kadrlar tapshylyǵy máselesi is júzinde sheshimin tapqan.
Aýdanda aýyl sharýashylyǵy da qarqyndy damyp keledi. Májilis depýtattary bıyl iske qosylǵan «MF Ramadan» JShS-niń sút fermasynyń jumysymen tanysty. Kásiporyn 1 100 golshtın-frız tuqymdy saýyn sıyr ustaýǵa arnalǵan. Tehnologııalyq turǵydan jańa saýý jabdyǵynyń kómegimen ferma táýligine orta eseppen 27 tonna, jylyna 10 myń tonnaǵa deıin sút óndirýdi josparlap otyr.
Osakarov aýdanynda Májilis tóraǵasy men depýtattarǵa taǵy bir ınvestısııalyq joba – qýaty 150 MVt bolatyn jel elektr stansasynyń qurylysy tanystyryldy. Búginde munda josparlanǵan 21 jel qondyrǵysynyń 9-y iske qosylyp, energııa óndirip jatyr. Alynǵan «jasyl» elektr energııasy qosalqy stansa arqyly jalpy taratý jelisine jiberiledi. Joba aıasynda aýyldan 20 jańa jumys orny ashylǵan.
Delegasııa sondaı-aq 2020 jyly tolyq qaıta jańǵyrtýdan ótken «Jastar» balalar men jasóspirimder ortalyǵyna bardy. Qazirgi tańda ortalyqta zamanaýı baǵyttar boıynsha 25 úıirme jumys isteıdi. Aýyldyń 600-den asa balasy munda IT, robottehnıka, jasandy ıntellekt, mýzyka men teatr óneri, qoldanbaly shyǵarmashylyq, tilder jáne basqa da salalar boıynsha bilim alyp jatyr.
Osy jerde Májilis depýtattary Osakarov aýdanynyń jurtshylyǵy ókilderimen kezdesti. Áńgime barysynda jergilikti óndiristi damytý perspektıvalary talqylandy. Atap aıtqanda, aldaǵy jyldary óńirde syıymdylyǵy 2 500 tonna bolatyn kókónis saqtaý qoımasy, 6 myń bas malǵa eseptelingen elimizdegi eń iri sút-taýar fermasy, jylyna 45 mln kirpish shyǵaratyn kirpish zaýytynyń qurylysy, sondaı-aq sýarmaly jerlerdiń aýmaǵyn aıtarlyqtaı keńeıtý isi josparlanyp otyr.
E.Qoshanov ótken sessııada qabyldanǵan Salyq, Bıýdjet jáne Sý kodeksteri, sondaı-aq áleýmettik damý baǵytyndaǵy birqatar zań jóninde aıtty. Olardyń qatarynda «Keleshek» jınaqtaý júıesi týraly zań, daryndylardy qoldaý normalary, MÁMS júıesinde bazalyq medısınalyq kómekti saqtaý, onkoskrınıngti keńeıtý men basqa da mańyzdy bastamalar bar.
Odan bólek, E.Qoshanov aýdandyq máslıhat depýtattaryn zań shyǵarý jumysyna belsendirek qatysýǵa shaqyrdy. О́z usynystaryn Qoǵamdyq palata arqyly engizip, sondaı-aq Májilis saıtyndaǵy arnaýly modýldiń múmkindikterin paıdalanýǵa keńes berdi. Bul jaıt qabyldanatyn zańdardyń sapasyn arttyryp, olardyń naqty óńirlik jaǵdaılarǵa saı bolýyna yqpal etedi.
Azamattardyń, kásipkerlerdiń jáne aýdan basshylyǵynyń ótinishteri men usynystary Májilis depýtattary tarapynan jańa parlamenttik sessııa bastalǵan kezde talqylaýǵa shyǵarylady.
