Áleýmettik nysandar jaǵdaıymen tanysty

Senator Baýyrjan Qanıev Aqtóbe obly­sy­­^­nyń ákimderimen, oblystyq máslıhat depý­tat­tary­men jáne ardagerler qoǵamdas­tyǵy­nyń ókilderimen jylytý maýsymyna daıyn­dyq, ınfra­qu­rylym jobalaryn iske asy­rý, bıýd­­jettiń atqarylýy jáne mem­lekettik qarjy­ny paıdalanýdyń tıimdiligi máselelerin talqylady.

«Ulttyq maqsatty óńirlermen tyǵyz baılanyssyz júzege asyrý múmkin emes. Bul jerde adamdar kúndelikti ómirde nemen betpe-bet keletinin baıqaýǵa bolady. Mundaı saparlar memleket deńgeıinde júıeli sheshýdi jáne qoldaýdy qajet etetin máselelerdi tereń túsinýge múmkindik beredi», dedi senator.

Depýtat kommýnaldyq qyz­met­terdiń kúzgi-qysqy kezeńge daıyn­dyǵyna, áleýmettik jáne ın­jenerlik nysandar quryly­synyń barysyna qanyǵyp, óńirde ornyqty ekonomıkalyq ósýdi qamtamasyz etý jónindegi jumys­tardyń sapaly bolýyn eske saldy.

Senat depýtaty Talǵat Júnisov Aqmola oblysyndaǵy Býrabaı jáne Bulandy aýdandarynda bolyp, áleýmettik jáne ınfraqury­lymdyq jobalardy iske asyrý barysymen ta­nysty. Ol sondaı-aq Kenesary jáne Qatarkól aýyldarynda mádenı ortalyqtar qurylysynda, Shýchınsk qalasynda orman sharýashylyǵy, ekologııa jáne týrızm joǵary kolledjinde boldy. «Zvezdnyı» lagerinde bolǵan kezde balalardy ornalastyrý, tamaq­tan­dyrý jáne bos ýaqytty ótkizý barysymen tanysty, mekeme ujymymen áńgimelesti.

Buǵan qosa depýtat Atameken aýyldyq okrýgindegi Jasyl jáne Shıeli aýyldarynda sý qubyryn salý jobalaryn iske asyrý barysymen tanysty. Bulandy aýdanynyń Voznesenka aýylynda bolyp, mádenı ortalyq qurylysyn jáne kópirdi qaıta jańartý jumysyn kórdi. Ol Balýan Sholaq atyndaǵy mektep-lıseı men Makınsk qalasyndaǵy №1 orta mekteptiń kúrdeli jóndeý jumystarymen tanysty. Ustazdarmen áńgime barysynda jańa oqý jylyna daıyndyq, oqý oryndaryn jaraqtandyrý jáne oqytýǵa jaǵdaı jasaý máseleleri kóterildi.

Al Senat depýtaty Nurtóre Júsip Memle­kettik qyzmet isteri agenttigi janyndaǵy Ádep jónindegi komıssııanyń kezekti otyrysy­na qatysty. Ol óz sózinde qazirgi álemde bolyp jatqan shuǵyl ózgerister jaǵdaıyn­da mem­lekettik qyzmet qoǵam nazarynda ekenin atap ótti. Onyń aıtýynsha, azamattar memlekettik qyzmetshilerden quzyrettilikti ǵana emes, bıik adamgershilikti, ádildik pen adamǵa qurmet kórsetýdi kútedi. Sondyqtan olardyń minez-qulqynyń etıkalyq erejesin qalyptastyrý memlekettik saıasattyń basymdyǵyna aınaldy.

«Bul komıssııanyń damýy memlekettik basqarýda adaldyq, azamattardyń quqyǵyn qurmetteý, qoǵam múddesine qyzmet etý sııaqty qundylyqtardy birinshi orynǵa shyǵaratyn aýqymdy reformanyń bóligi bolýǵa tıis. Sonymen qatar sıfrlyq transformasııa jáne qoǵamdyq baqylaý kúsheıe túsken jaǵdaıda memlekettik qyzmetshilerdiń kez kelgen is-áreketi aıqyn bolady. Demek, olardyń minez-qulqyna qoıylatyn talap ta qataıa túsedi. Sondyqtan Ádep jónindegi komıssııa tóreshi ǵana emes, ádil jáne ashyq memlekettik basqarýdyń tálimgeri, keńesshisi jáne kepilgeri bolýǵa tıis», dedi N.Júsip.

Depýtattyń aıtýynsha, Prezıdent óz Joldaýlarynda memlekettik qyzmettiń etıkalyq mádenıetin arttyrý, merıtokratııa, ashyqtyq jáne halyqqa qyzmet etý qaǵıdasyna negizdelgen basqarýshy elıtany qalyptastyrý, sondaı-aq sybaılas jemqorlyq kórinisine múldem tózbeý qajettigine nazar aýdaryp otyr. Bul turǵyda Ádep jónindegi komıssııa tek konsýltatıvtik organ emes, memlekettik basqarýdy jańǵyrtý jónindegi Prezıdent saıa­satyn iske asyrýdyń tıimdi tetigi bolýǵa tıis.