Rekordty tirkeý barysynda Aqtóbe ferroqorytpa zaýytynyń №43 peshinde bir tehnologııalyq sıklda 177 tonna joǵary kómirtekti ferrohrom óndirildi. №4 sehtyń peshteri – óz sanatyndaǵy álemdegi eń qýatty peshterdiń biri. Zaýyt mamandarynyń júzege asyrǵan biregeı tehnıkalyq sheshimderiniń arqasynda jabdyq búgingi kúni jobalyq kórsetkishterden joǵary kúshpen jumys isteıdi. Eger ortasha alǵanda bir osyndaı pesh shyǵarylymda 50-60 tonna ferroqorytpa berse, qazirgi jaǵdaıda aıtarlyqtaı úlken kólem jınaqtaldy. Bul álemdik rekord retinde bekitilgen teńdessiz nátıjege negiz boldy.
Rekord ornatýǵa arnalǵan saltanatty rásimge Aqtóbe oblysynyń ákimi Ashat Shaharov qatysty. Ol zaýyt ujymyn jetistikpen quttyqtap, bul rekord otandyq mamandardyń joǵary biliktiliginiń jáne óńir men elimizdiń zor ındýstrııalyq áleýetiniń aıqyn dáleli ekenin atap ótti.
«Búgin biz tarıhı oqıǵanyń kýási boldyq. Aqtóbe ferroqorytpa zaýyty ónim óndirý kólemi boıynsha álemdik rekord ornatty. Alǵash ret № 43 peshte bir tehnologııalyq sıkl barysynda 150 tonnadan astam joǵary kómirtekti ferrohrom óndirildi. Tamasha jetistikpen zaýyt ujymyn shyn júrekten quttyqtaımyn. Bul – naǵyz eńbek adamdaryna tán kásibıliktiń, tabandylyqtyń, birliktiń jáne rýhtyń jarqyn úlgisi. Zaýyt jumysshylary ystyqta da, sýyqta da kúni-túni aıanbaı eńbek etip, óndiris kólemin álemdik deńgeıge jetkizdi. Kásiporyn otandyq ónerkásiptiń halyqaralyq standarttarǵa saı ǵana emes, sonymen qatar sol standarttardy qalyptastyra alatyn qabileti bar ekenin dáleldedi. Rekord – tek zaýyt pen Aqtóbe óńiriniń jeńisi ǵana emes, otandyq ónerkásiptiń áleýetiniń aıqyn dáleli», dedi oblys ákimi.
Aıtýynsha, bıylǵy jyldyń Jumysshy mamandyqtar jyly dep jarııalanýy da búgingi oqıǵanyń mańyzyn arttyra túsedi. Ulttyq quryltaı otyrysynda Prezıdent qoǵamda adal azamat, ıaǵnı ádil, jaýapty ári eńbekqor azamat beınesin qalyptastyrýdyń mańyzyn erekshe atap ótken edi. Ashat Shaharovtyń sózinshe, osyndaı jetistikter eńbek adamynyń qoǵamdaǵy qurmetin arttyrýǵa septigin tıgizedi. Bul – naqty sektor men mamandardyń jankeshti eńbegi elimizdiń ornyqty damýynyń senimdi tiregine aınalǵanynyń belgisi.
Rekordty tirkeý táýelsiz sarapshylardyń baqylaýymen, WORLD BOOK OF RECORDS (WBR) ókilderiniń, metrologııalyq qyzmettiń jáne tehnıkalyq komıssııanyń qatysýymen ótti. Metall shyǵarylymynan onyń salqyndaýyna, ólsheýine jáne qujattalýyna deıingi árbir kezeń qatań túrde bekitildi jáne sertıfıkattalǵan ólsheý quraldarymen rastaldy.
«Bul rekord – naǵyz tehnologııalyq jeńis. Bul – jahandyq syn-qaterlerge qaramastan, ERG óz kóshbasshylyǵyn, turaqtylyǵyn jáne ósý áleýetin kórsetip otyrǵanynyń jarqyn belgisi. Bul jetistiktiń artynda tek metall, sandar men jabdyq qana turǵan joq, eń aldymen, bul – bizdiń adamdar. «Qazhrom» metallýrgteriniń kásibıligi, jankeshtiligi men óz isine degen senimi múmkin emes dúnıeni múmkin etti. Eńbek adamdarynyń jyly aıasynda bul rekord – eldiń ekonomıkalyq qýatyn kún saıyn qalyptastyryp júrgen jandarǵa degen qurmettiń sımvoly», dedi ERG dırektorlar keńesiniń tóraǵasy, bas atqarýshy dırektor Shýhrat Ibragımov.
WORLD BOOK OF RECORDS uıymynyń Azııa men Afrıka elderi boıynsha basshysy Qýandyq Qudaıbergenovtyń aıtýynsha, aýyr ónerkásip salasynda rekordtar jıi tirkele bermeıdi, bul jolǵy jetistik sonysymen erekshe. «Bul oqıǵa bir kásiporynnyń sheńberinen shyǵyp, Qazaqstannyń tehnologııalyq bedelin jáne túgel ónerkásip salasynyń áleýetin moıyndaý» deıdi ol.
Marapattaý rásimi metallýrgter kúnine arnalǵan merekelik is-sharalar aıasynda ótti. Rekordty tirkeýdi rastaıtyn qujatty qabyldaı otyryp, «Qazhrom» TUK AQ bas dırektory Sergeı Prokopev zaýyt komandasynyń úlken jumysyn atap ótti.
«Bul – batyl ınjenerlik sheshimder men shynaıy komandalyq jumystyń nátıjesi. «Qazhromnyń» 30 jyldyǵy men Qazaqstandaǵy jumysshy mamandyqtar jylynda osynaý jańalyq el ónerkásibiniń álemdik deńgeıde bolýy múmkin jáne mindetti ekenin bildiredi. Aqtóbe zaýytynyń komandasymen maqtanamyn – sizder tek maksımaldy kólemdi óndirip qana qoıǵan joqsyzdar, sizder tarıhty jasadyńyzdar», dedi Sergeı Prokopev.
О́z kezeginde №43 rekordtyq peshtiń brıgadıri Gennadıı Kýhar ár shyǵarylymymyz – komandalyq jumys pen joǵary jaýapkershilik. Biraq osy kúni shyn máninde úlken nárse istep jatqanymyzdy túsindik. Bul rekord – barlyq aýysym úshin, zaýyt úshin dep pikir bildirdi.
Rekord ornatý eldegi Jumysshy mamandyqtar jyly men «Qazhrom» TUK AQ 30 jyldyǵyna oraılastyrylǵan.
2024 jyly «Qazhrom» 2023 jylmen salystyrǵanda óndiris kólemin 14%-ǵa arttyryp, 1,85 mln tonnadan astam ferroqorytpa óndirip, kompanııa tarıhyndaǵy eń joǵary kórsetkishke qol jetkizdi.
Merekelik jıyn sońynda Shýhrat Ibragımov el metallýrgterin tól merekelerimen quttyqtap, zor densaýlyq, berekeli eńbek pen jarqyn jeńister tiledi.
