Atalǵan is-sharaǵa elimizdiń atynan arnaıy delegasııa qatysyp, óz tájirıbelerimen bólisti. Mamyr aıynda Astanada ótken halyqaralyq «Robotek Grand Tournament» chempıonatynda ázerbaıjandyq komandalardyń joǵary belsendilik tanytýy – qos tarap arasyndaǵy yntymaqtastyqtyń naqty kórinisi. Osy chempıonat aıasynda túrkitildes elderdiń úzdik komandalary bas qosyp, «TurkTime!» jahandyq bastamasy sheńberinde yntymaqtastyq týraly birneshe memorandýmǵa qol qoıylǵan edi.
«Halyqaralyq jarystardyń tájirıbesi kórsetkendeı, sıfrlyq dáýirde elder arasyndaǵy shekaralar emes, ıdeıalar men tehnologııalar mańyzdy. Sondyqtan biz jańa mazmundaǵy olımpıadalardy qolǵa alyp jatyrmyz. Sonyń biri – «Caspian Cup» atty ashyq chempıonat. Qazaqstandyq seriktesterimizdi Bakýde kóretinimizge senimdimiz», dedi «AREA» ınjenerlik akademııasynyń bas dırektory Rahman Rasýlzade.
Jalpy, Ázerbaıjan robototehnıkany damytýǵa on jyldan astam ýaqyt buryn bet burǵan. Búginde bul el World Robot Olympiad sekildi jahandyq baıqaýlarda turaqty jeńisterge jetip júr. Technoxian Azerbaijan jobasyna úsh mınıstrlik – Jastar jáne sport mınıstrligi, Sıfrlyq damý jáne kólik mınıstrligi, sondaı-aq Innovasııalar men sıfrlyq damýdy qoldaý agenttigi (IDDA) qoldaý kórsetip otyr.
«Astanadaǵy chempıonat bizge erekshe áser qaldyrdy. Jańa astana – biregeı megapolıs. Eń bastysy, biz Qazaqstanda robototehnıkanyń júıeli túrde damyp jatqanyn kórdik. «Robotek Grand Tournament» – IT salasyndaǵy halyqaralyq mańyzy bar brendke aınaldy», dedi Ázerbaıjandaǵy World Robot Olympiad ulttyq úılestirýshisi Kenan Karımov.
Búginde Astanadaǵy «Robotek» mektebi otandyq ıntellektýaldyq jobalardy álemdik deńgeıdegi olımpıadalarmen ushtastyryp, tehnologııalyq transformasııanyń naqty úlgisine aınalyp otyr. Panamada eki jyl buryn qol qoıylǵan halyqaralyq memorandýmdar tabysty júzege asyp jatyr.
2025 jylǵy «Robotek Grand Tournament» burynǵydan da aýqymdy ótti. Qazaqstan astanasynda ótken bul dodaǵa alǵash ret AQSh, Bolgarııa, Ázerbaıjan, Moldova, О́zbekstan, Qyrǵyzstan, Tájikstan syndy elderden 25-ten astam komanda qatysty.
«Túrkitildes elderdiń tehnıkalyq bilim berý oshaqtarymen ózara áriptestik ornatý – bizdiń basty maqsatymyz. Bakýde ótken kezdesý barysynda chempıonat aıasyn keńeıtý, «Caspian Cup» jobasyna qazaqstandyq komandalardyń qatysýy, sondaı-aq bolashaq birlesken jobalardyń baǵyty aıqyndaldy», dedi «Robotek» mektebiniń bas dırektory Sanjar Shalqarbekov.
Qazirgi tańda álemdik robototehnıka únemi ózgerip, jańaryp keledi. Bul saladaǵy ulttyq, óńirlik jáne halyqaralyq chempıonattar – jas urpaqtyń jańa múmkindikter keńistigine shyǵýyna jol ashatyn biregeı alań. Qazaqstan men Ázerbaıjan arasyndaǵy yntymaqtastyq – osy úrdistiń naqty dáleli.
