Foto: Ashyq derekkóz
Ǵylym jáne joǵary bilim mınıstrliginiń málimetinshe, 2025 jyly eń kóp suranysqa ıe baǵyttar qatarynda – «Pedagogıkalyq ǵylymdar», «Injenerlik, óńdeý jáne qurylys salalary», sondaı-aq «Bıznes, basqarý jáne quqyq» salalary bar.
Aıta keteıik, test tapsyrýǵa ótinishter 1 maýsym men 8 shilde aralyǵynda app.testcenter.kz saıtynda qabyldandy.
Ǵylymı-pedagogıkalyq magıstratýraǵa túsýshiler úshin test úsh negizgi bólimnen turady: shet tili, oqýǵa daıyndyǵyn anyqtaý, jáne bilim berý baǵdarlamalarynyń beıini boıynsha suraqtar. Barlyǵy 3 saǵat 55 mınýt ýaqyt beriledi. Synaqtan sátti ótý úshin talapker jalpy keminde 75 ball jınaýy tıis. Bul kórsetkishtiń ishine: shet tilinen 25 balldan, daıyndyq deńgeıinen 7 balldan, jáne eki beıindi pánniń árqaısysynan 7 balldan kem bolmaýy tıis.
Beıindi magıstratýraǵa tapsyrýshylar tek eki beıindi pán boıynsha testileýden ótedi. Munda shekti ball 30, onyń ishinde ár pánnen kem degende 7 ball jınaý qajet.
Testileý nátıjesimen kelispeıtin talapkerler emtıhan aıaqtalǵan soń 30 mınýt ishinde onlaın-apellıasııaǵa ótinish bere alady. Apellıasııalyq komıssııa shaǵymdy bes kún ishinde qaraıdy. Qorytyndy nátıje talapkerdiń jeke kabınetine jiberiledi.
2025 oqý jylyna magıstratýra boıynsha 13 myńnan astam memlekettik grant bólingen. Granttar suranys joǵary mamandyqtarǵa baǵyttalǵan.
Grant konkýrsyna qujat qabyldaý kezeńi 12–18 tamyz aralyǵyn qamtıdy. Al grant ıegerleri 25 tamyzǵa deıin belgili bolady. JOO-larǵa qabyldaý rásimi 28 tamyzǵa deıin aıaqtalady.
