Foto: Úkimettiń baspasóz qyzmeti
Jıynǵa Úkimet basshysynyń orynbasary Ermek Kósherbaev, Densaýlyq saqtaý mınıstri Aqmaral Álnazarova, Ishki ister mınıstri Erjan Sádenov jáne Ádilet vıse-mınıstri Laýra Mersalımova qatysty.
Resmı málimetterge súıensek, sońǵy jyldary dárigerler men medbıkelerge qatysty 170-ten astam shabýyl faktisi tirkelgen. Osyǵan baılanysty Densaýlyq saqtaý mınıstrligi birqatar naqty sharalar ázirleýdi bastady. Olardyń qatarynda:
- Medısına qyzmetkerlerine jasalǵan shabýyldy quqyq qorǵaý organdary ókilderine qarsy áreketpen teńestirý;
- Aq halattylarǵa smart-beınejetondar berý;
- Emhanalar men aýrýhanalarda júıeli kúzet júıesin engizý;
- Qabyldaý bólimshelerine táýlik boıǵy polısııa beketterin ornalastyrý.
Premer-mınıstr Oljas Bektenov bul máselege erekshe nazar aýdaryp, medısına mamandaryna shabýyldardy quqyqtyq turǵyda qatań toqtatý qajettigin atap ótti.
«Memleket basshysynyń tapsyrmasynyń oryndalýyn qamtamasyz etý qajet. Dárigerlerge shabýyl jasalǵan mundaı oqıǵalar quqyqtyq ádistermen qatań túrde toqtatylýy kerek. Osyǵan baılanysty densaýlyq saqtaý, ishki ister, ádilet mınıstrlikterine on kún merzim ishinde qyzmettik mindetterin atqarý kezinde medısına qyzmetkerlerine qatysty zorlyq-zombylyq jasalǵany úshin qylmystyq jaza qarastyrý boıynsha zańnamalyq túzetýler ázirlep, engizýdi tapsyramyn», dedi Oljas Bektenov.
Ishki ister mınıstri Erjan Sádenovtiń aıtýynsha, qazirgi tańda el boıynsha 115 medısınalyq mekeme polısııanyń turaqty kúzetine alynǵan, al qabyldaý bólmelerinde táýlik boıy kezekshilik uıymdastyrylǵan. Sondaı-aq, shuǵyl jaǵdaılarǵa jedel áreket etý maqsatynda arnaıy patrýldik toptar medısınalyq mekemelerge jaqyn jerlerde ornalasqan.
Buǵan qosa, Úkimet halyq arasynda túsindirý jumystaryn kúsheıtip, medısına qyzmetkerlerine degen qurmet pen qoldaý mádenıetin qalyptastyrýdy da negizgi baǵyt retinde aıqyndap otyr.
