EO josparyna sáıkes, salyq salynýy múmkin ónimderdiń jalpy quny 100 mlrd eýrony quraıdy. Bul AQSh-tyń Eýropaǵa jyl saıyn eksporttaıtyn 335 mlrd eýro kólemindegi taýarlarynyń úshten birine jýyǵy. Salyq engizilýi múmkin negizgi ónimder qataryna Boeing ushaqtary, amerıkalyq avtokólikter men «býrbon» vıskıi kiredi.
Eýroodaqtyń bul áreketi AQSh bıliginiń 1 tamyzdan bastap EO elderinen keletin taýarlarǵa 30% baj salyǵyn engizýi múmkin degen málimdemesine jaýap retinde qarastyrylyp otyr.
Sarapshylardyń pikirinshe, eger AQSh tarıfterdi rasymen engizse, bul jahandyq saýda qatynastaryna keri áser etýi múmkin. Sonymen qatar EO elderi 2023 jyly qabyldanǵan Ekonomıkalyq qysymǵa qarsy qural (ACI) aıasynda da birqatar jaýap sharalaryn qolǵa alýy yqtımal. Atap aıtqanda, AQSh tehnologııalyq kompanııalaryna salyq salý, amerıkalyq ınvestısııalarǵa shekteý qoıý jáne amerıkalyq kompanııalardyń Eýroodaq naryǵyna kirýin shekteý qarastyrylyp jatyr.
Degenmen EO-ǵa múshe memleketterdiń basym bóligi AQSh-pen kelissózderdi jalǵastyrýdy, daǵdarysty beıbit jolmen sheshýdi qoldaıdy.
Aıta keteıik, buǵan deıin AQSh Qazaqstannan ımporttalatyn keıbir taýarlarǵa da 25% baj salyǵyn engizgen bolatyn. Alaıda Úkimet bul shara Qazaqstan eksportynyń 95%-yna áser etpeıtinin málimdedi.
Sondaı-aq 23 shildede AQSh pen Japonııa jańa saýda kelisimine qol jetkizdi. Kelisim aıasynda AQSh japon taýarlaryna 25%-dyń ornyna 15% tarıf engizse, Japonııa amerıkalyq ónimderge óz naryǵyn keńeıtýdi jáne AQSh ekonomıkasyna 550 mlrd dollar kóleminde ınvestısııa salýdy moınyna aldy.
