Búginde baspana alý úshin jyldar boıy úı kezeginde turǵan adamdar qalada ǵana emes, aýyldyq jerlerde de kóp. Sondaı qoljetimdi baspanaǵa qol jetkize almaı júrgen kópbalaly ári jalǵyzilikti ananyń biri – Saıangúl Qalqashova. Jarma aýdany, Qaratóbe aýyldyq okrýgi Ádı (osy aýylda týǵan maıdanger jazýshy, fılologııa ǵylymdarynyń doktory Ádı Sháripovtiń qurmetine qoıylǵan ataý) aýylynyń turǵyny eken.
Kúmis alqa ıegeri S.Qalqashovanyń aıtýynsha, úı kezegine 2000 jyly turypty. Tabany kúrekteı 25 jyl. Kezegin shırek ǵasyr taban aýdarmaı kútken ananyń alty balasy bar, kúıeýi 2022 jyly dúnıeden ótken. Bir balasynyń kórý qabileti tómen, biraq múgedektigin áli ala almaǵan. Búginde balalardyń úlken ekeýi kámelet jasynan asqan. Qyzy turmysqa shyǵyp, úlken uly anasy men baýyrlaryna kómektesemin dep oqýyn tastap, jumys istep ketken.
Sonymen 25 jyl ótse de, úı kezeginde ózgeris joq, kerisinshe kezegi shegerile bergen. Tipti 2021 jyly, keıin 2023 jyly jeltoqsan aıynda kezekke turǵan. Biraq tirkegeni de esepke alynbaı, 2024 jyldyń jeltoqsanynda kezekke qaıta turýǵa májbúrlegen kórinedi.
– 2024 jyly jeltoqsanda úı kezegine taǵy turdym. Qazir, mine, kezekte toqsanynshymyn. Maǵan aýdan ákiminiń ózi sol kezde bir-eki aıdyń ishinde úı alasyz degen. Alaıda eki aı túgili, alty aı ótti. Alty aı ishinde ákimge taǵy da úsh ret bardym. «Sizge úı joq emes, bar, alasyz» deıdi de, shyǵaryp salady. 9-synyp bitirgen balam eki jyldan keıin 18 jasqa tolady. Sodan soń kámeletke tolmaǵan úsh balam ǵana qalady. Onda maǵan talap boıynsha úı berilmeıdi, – deıdi S.Qalqashova.
Saıangúl sekildi qanshama ananyń jyldar boıy saryla kútken páterine kezegi endi kele bergende, ne jasy zeınetkerlikke jetip, ne balalary kámeletke tolyp, baspana kózden bulbul ushatyny jasyryn emes.
– Qazir úıimdegi peshim qulap tur. Ne kómektesetin adam joq. Janymda otyrǵan týys-týǵanym da joq. Ákem ómirden ozyp ketti, sheshemiz seksenge keldi. Ol kisiniń ózine kómek kerek, – dep kópbalaly ana muńyn shaqty.
«Aýyldan nege kóshkilerińiz keledi?» dep suradym. Jalǵyzilik ana aýyldyń bolashaǵyna senbeıdi. «О́ıtkeni aýylda qazir elýdeı tútin qalǵan, mekteptiń ózi áreń tur. Bir synypta bir bala oqıdy. 9 synypqa deıin ǵana. Ne baılanys joq, jan-jaqpen sóıleskisi keletin jurt osylaı jeli qýalap taýda júredi», deıdi.
Abaı oblysy
