Senat depýtaty Rýslan Rústemov Qyzylorda oblysyndaǵy Jańaqorǵan aýdanynyń kópsalaly aýrýhanasynda bolyp, mekeme ujymymen kezdesti. Kezdesýde medısına qyzmetkerleriniń qaýipsizdigi máselesine basa nazar aýdaryldy. Senator medısına qyzmetkerlerine zorlyq-zombylyq kórsetkeni úshin jazany qatańdatý jónindegi Parlament depýtattarynyń, dárigerler qaýymy men azamattardyń zańnamaǵa ózgerister engizý týraly usynystaryn Memleket basshysy qoldaǵanyn atap ótti.
«Dárigerler qaýymy kún saıyn adam ómirin saqtap qalýǵa aıanbaı eńbek etedi, olar qurmet pen qoldaýǵa jáne qorǵaýǵa laıyq. Olarǵa degen kez kelgen agressııa búkil qoǵamnyń toptasa áreket etýin qajet etedi. Ondaı jaǵdaıdy «Zań jáne tártip» qaǵıdaty boıynsha zańǵa sáıkes qatań túrde jolyn kesý kerek. Azamattyq qoǵamnyń pikirin mindetti túrde eskere otyryp, medısına qyzmetkerlerin qorǵaýdyń quqyqtyq tetikterin kúsheıtýge baǵyttalǵan usynystardy odan ári muqııat qarastyramyz», dedi R.Rústemov.
Depýtattar Olga Býlavkına men Shákárim Buqtuǵutov Shyǵys Qazaqstan oblysyndaǵy Shemonaıha aýdanynda boldy. Onda olar jylý jiberý stansasy qurylysymen tanysty. Mundaǵy jańǵyrtý jobasy qarjy tapshylyǵyna tap bolyp, qurylys merziminde aıaqtalmaıyn dep tur.
Senatorlar Úbi ózeni arqyly ótetin kópirdiń qurylysyna da bardy. Munda da tıisti jobalyq saraptama bolmaı, jumystar keıinge qaldyrylǵan. Bul aýdandaǵy kólik qatynasyna kedergi bolyp otyr.
Depýtattar sondaı-aq «Úbi» shekaralyq ótkeliniń jaı-kúıi syn kótermeı turǵanyn aıtady. Nysanǵa kirme jol men tıisti ınfraqurylymnyń jaǵdaıy óte nashar. Senatorlar bul jaǵdaıǵa alańdaýshylyq bildirip, tıisti ótinishterdi salalyq mınıstrlikterge jiberý kerektigin eskertti.
Depýtattar Shyǵys Qazaqstan oblysy ǵana emes, sút ónimderin basqa óńirlerge de jetkizetin «Sıver plıýs» JShS sút zaýytynyń jumysymen de tanysty. Onda kadrmen qamtamasyz etý jáne óndiris qýatyn ulǵaıtýdyń keleshegi talqylandy. Al qurama jem zaýytynda oblystyń aýyl sharýashylyǵy salasynyń qazirgi jaı-kúıi, sapaly azyqpen qamtamasyz etý problemalary, sondaı-aq agrarlyq sektordy qoldaý talqylandy.
Al senator Andreı Lýkın bıyl qyrkúıekte Astanada ótetin Álemdik jáne dástúrli dinder lıderleriniń VIII sezine daıyndyq aıasynda elordada salynyp jatqan jańa ǵıbadathana kesheniniń qurylysymen tanysty. Onda memlekettik organdar, dinı qyzmetkerler men merdiger uıymdardyń ókilderimen keńes ótti.
Senatordyń aıtýynsha, bul joba dinı konfessııalar arasyndaǵy dıalogti nyǵaıtýǵa yqpal etedi. Sondaı-aq dinaralyq jáne mádenıetaralyq yntymaqtastyq ortalyǵy retindegi elimizdiń jahandyq mıssııasyn ilgeriletýge de úles qosady.
«Bul keshen sáýlet óneriniń záýlim ǵımaraty, sondaı-aq halyqaralyq qoǵamdastyq aldynda el birligi, rýhanı murasy men ashyqtyǵynyń beınesine aınalady. Álemdik jáne dástúrli dinder kóshbasshylarynyń VIII sezine deıin joba tolyq aıaqtalýǵa tıis», dedi A.Lýkın.
Sáýletti ǵımarattar kesheni quramynda áýlıeler ǵıbadathanasy, Sergıı Radonejskıı shirkeýi, sondaı-aq rýhanı-mádenı jáne aǵartý ortalyǵy bar. Qazaqstannyń dinı jáne mádenı baı murasyn beıneleıtin jańa keshen elordadaǵy rýhanı mańyzdy orynǵa aınalýǵa tıis. Ol qaıyrymdylyq qarjysyna salynyp jatyr.
