«Otbasy bank» AQ Jetisý oblystyq fılıalynyń dırektory Jasulan Qurmanǵalıevtiń aıtýynsha, endi turǵyn úı kezegine qoıý jáne úı bólý rásimi orken.otbasybank.kz portaly arqyly júrgiziledi. Buǵan deıin qoldanylyp kelgen Kezekte.kz platformasynyń málimetteri jańa júıege kóshirilip, taldaý jáne tehnıkalyq jetildirý jumystary aıaqtalýǵa jaqyn. Jańa portal 1 tamyzdan bastap iske qosylady.
Jańa júıe boıynsha jalgerlik jáne nesıelik turǵyn úıler beriledi. Nesıelik baspana burynǵy erejelermen úlestirilse, jaldamaly úı alýda kezekke turǵan kún esepke alynady. Aıta keterligi, jalgerlik baspana alýshylardan tólem qabilettiligin dáleldeý talap etilmeıdi. Mundaı úılerdiń 70 paıyzy áleýmettik osal toptarǵa, 20 paıyzy jetim balalarǵa, al qalǵan 10 paıyzy basqa azamattarǵa beriledi.
Alakól aýdanynda búginde turǵyn úı kezeginde 1 674 adam tur. Osy máseleni sheshý úshin bıyl áleýmettik osal toptarǵa arnalǵan 100 jaldamaly úıdiń qurylysy júrgizilýde. Olar jyl sońyna deıin paıdalanýǵa beriledi.
Turǵyndarǵa endi ákimdikterge júginýdiń qajeti joq, barlyq málimet pen ótinishter «Otbasy bank» arqyly onlaın qabyldanady. Júıeniń tolyq iske qosylýyna baılanysty bank mamandary óńirlerde túsindirý jumystaryn bastaıdy.
