Bıylǵy qysqy Azııa oıyndarynda (Harbın, Qytaı) frıstaıl-akrobatıka sportynan ulttyq qurama sapynda Shymkentten 6 sportshy qatysty. Jarys qorytyndysynda Sherzod Hashırbaev birinshi oryn alyp, tarıhı jeńiske qol jetkizdi. Úndistanda qazaq kúresinen ótken álem chempıonatynda Ersultan Muzapparov pen Jumajan Qojambekov chempıon atandy. Aýyr salmaq boıynsha áıelder kúresinde Albına Bahıeva bes qarsylasyn da shaq keltirmeı altynnan alqa taqty. Slovenııada sporttyq gımnastıkadan ótken álem kýboginde Dııas Toıshybek gımnastıkalyq at snarıadymen synǵa túsip, jeńimpaz atandy. Shymkentte jalaýy jelbiregen ulttyq teńge ilýden alǵashqy álem chempıonatynda Tóltaı Baqyt, Túlkibaı Azat bas júldege ıe boldy. Astanada uıymdastyrylǵan bokstan álem kýboginde Mahmud Sabyrhan chempıon atandy. Germanııadaǵy jazǵy ýnıversıadada taekvondo sportynan Samırhon Ababakırov altyn aldy. Aty atalǵan barlyq sportshyny qala ákimi arnaıy qabyldap, syı-sııapat kórsetti.
«Shymkent qalasynda jyl basynan beri birneshe iri sporttyq is-sharalar júzege asyryldy. Jarystarda shymkenttik te órender júldege talasty. Olardyń kópshiligi oryn sany jaǵynan alǵashqy úshtikten kórinip, tek megapolıstiń ǵana emes, tutas qazaq eliniń mereıin ústem etti. Sporttyq baıqaýlardy atap ótsek, «Zhaksykul mergen cup» dástúrli sadaq atýdan Azııa kýbogi ótti. Jarysta alty shetel men elimizdiń óńirlerinen 100-ge jýyq sportshy synǵa tústi. Nátıjesinde, megapolıs mergeni bir qola medaldi qanjyǵaǵa baılady. Báıgeden elimizdiń chempıonatynyń irikteý týrnıri kil myqty shabarmandardy jınady. Ony tamashalaýǵa 3000-ǵa jýyq kórermen keldi. Saıys barysynda at qulaǵynda oınaǵandar qyz qýý, kókpar, aýdaryspaq sekildi ulttyq sport túrleri boıynsha ónerlerin kórsetti. Teńge ilýden mergender eresekter arasynda III Azııa kýboginde saıysty. Onda 7 memleketten kelgen 60 sportshy júldege talasty. Qalanyń surmergenderi bul saıysta bir kúmis júldege ıe boldy. Taekvondo ITF sportynan Azııa kýboginde 7 memleketten 850-ge jýyq sportshy baq synady. Shymkent qalasynyń sportshylary sol jarysta 7 altyn, 1 kúmis, 1 qola medal jeńip aldy. Taǵy bir saıys – grek-rım kúresinen jasóspirimder arasyndaǵy týrnır Jeńistiń 80 jyldyǵy men Aýǵan soǵysy qurbandaryn eske alýǵa arnaldy. Oǵan elimizden bólek, úsh shetelden qatysýshylar keldi. Jarysta qala sportshylary 2 altyn, 2 kúmis, 1 qola medal ıelendi. Sondaı-aq Qazaqstan halqynyń birligi kúnine oraı «Birlik» júgirý jarysy uıymdastyryldy. Oǵan 600-ge jýyq túrli etnos ókilderi qatysty. Tennısten Junior Billie Jean King Cup Final, Juniors Davis Cup Final Qualifying týrnırleri ótti. Oǵan 15 elden 80-ge jýyq sportshy shaqyryldy. Elimizdiń qyzdar qurama komandasy 4-orynnan kórinip, álem chempıonatyna joldama aldy. Bul jetistikter Shymkent qalasynyń sport ınfraqurylymynyń damýy men sportshylardyń kásibı deńgeıiniń joǵary ekenin taǵy bir márte dáleldedi. Qala ákimdigi aldaǵy ýaqytta da buqaralyq, kásibı sportty qoldaýdy jalǵastyra bermek», dedi Shymkent qalasy deneshynyqtyrý jáne sport basqarmasy basshysynyń orynbasary Ermek Dármenov.
Mamannyń aıtýynsha, Shymkentte balalar men jasóspirimderdi joǵary jetistikter sportyna baýlıtyn 11 olımpıadalyq rezervtiń mamandandyrylǵan sport mektepteri jumys atqarady. Mektepterde 40-tan astam sport túrleri qamtylǵan. Máselen, balalar men jasóspirimder erkin kúres, dzıýdo, sadaq atý, qol kúresi, karate, taekvondo, grepplıng, grek-rım kúresi, regbı, ýshý, basketbol, frıstaıl, konkımen mánerlep syrǵanaý, short-trek, shaıbaly hokkeı, kógaldaǵy hokkeı, kórkem gımnastıka, estetıkalyq gımnastıka sekildi ózderi qalaǵan sporttyq seksııalarǵa qatysa alady. Atalǵan sport mektepteri daryndy balalardy irikteý, olardy kásibı sportqa daıyndaý, halyqaralyq deńgeıdegi jarystarǵa shyǵarý jóninde júıeli jumystar júrgizip keledi.
Sonymen birge Shymkent shaharynda búginde 35 sport uıymy jumys isteıdi. Bul uıymdarda sporttyń 73 túrinen (olımpıadalyq – 36, olımpıadalyq emes – 27, ulttyq – 10) sportshylar daıyndalady. Sporttyq seksııaǵa jazylǵan 20 myńǵa jýyq órendi myńnan astam jattyqtyrýshy sportqa baýlıdy. 2025 jyly 61 sporttyq is-shara ótkizý josparlanǵan bolsa, sonyń búginge deıin 14-i ótkizildi. Jyl sońyna deıin 47 is-shara uıymdastyrý kózdelip otyr. Jan basyna shaqqandaǵy qarjylandyrý júıesi arqyly 18 000 vaýcherge 3,9 mlrd teńge bólinip, balalar men jasóspirimderdi sporttyq seksııamen qamtamasyz etýge 120 kásipker atsalysyp jatyr. Qazirgi tańda jan basyna qarjylandyrý júıesi boıynsha 16 381 bala sportpen qamtylsa, 1130-y kezekte tur.
Búgingi tańda halyq densaýlyǵyn nyǵaıtyp, buqaralyq sportqa tartý maqsatynda 27 sport nusqaýshysy 11 saıabaqta tańǵy jattyǵýlar ótkizedi. Bul – elimizdi salamatty Qazaqstanǵa aınaldyrý baǵytynda qolǵa alynǵan bastamanyń iske asqandyǵynyń kórinisi. Prezıdent Qasym-Jomart Toqaev aıtyp ótkendeı, ult saýlyǵy bárinen de mańyzdy bolýǵa tıis. Memleket basshysynyń arnaıy tapsyrmasyn oryndaý maqsatynda búginde megapolıste halyqty buqaralyq sportqa tartý maqsatyndaǵy jumystar qarqyndy júrgizilip keledi. Osy is-sharalardyń nátıjesinde shaharda buqaralyq sportpen qamtylǵan halyqtyń úlesi jyl saıyn arta tústi. Bul deneshynyqtyrý men sport arqyly turǵyndardyń densaýlyǵyn nyǵaıtýdy kózdeıtin memlekettik strategııanyń jemis bere bastaǵandyǵyn ańǵartady. Elimiz orta derjavaly memleket retinde aldyna úlken maqsattar qoıyp otyr. Al aýqymdy strategııalyq josparlardy iske asyrý úshin eń aldymen ulttyń densaýlyǵy myqty bolýy kerek.
Qalada 855 sport nysany bar (568 – sporttyq, 253 – bilim berý, 34 – sport mektepteri). 2025 jylǵa birneshe jańa sporttyq nysandardyń qurylysy men jóndeý jumystary josparlanǵan. Atap aıtqanda, qalanyń Qarataý aýdany ákimshilik aýmaǵynan jańa fýtbol stadıonynyń qurylysy qolǵa alynady. Paralımpıadalyq, sýrdolımpıadalyq sport kesheni salynady. Shahardyń shetki aımaǵynda ornalasqan Qaınarbulaq, Qarabastaý, Badam eldi mekenderinde modýldi sport nysandary boı kóteredi. №17 sport mektebinde jańa fýtbol alańy men manejder paıda bolady. Budan bólek, Qajymuqan atyndaǵy stadıon, Ortalyq sý sport kesheni, Muz saraıy, №17 sport mektebiniń Mamın-Sıbırıak kóshesindegi ǵımaratyna jóndeý jumystaryn júrgizý josparda tur. Salaǵa jaýapty mamannyń málimdeýinshe, shalǵaı eldi mekenderde sport ınfraqurylymyna arnalǵan jer telimderi zańdastyryldy. Endi demeýshiler esebinen 3 jańa nysannyń qurylysy qolǵa alynatyn bolady.
«Joǵaryda atalyp ótkendeı, 2025 jyldyń alǵashqy 5 aıynda shymkenttik sportshylar 656 júlde jeńip aldy. El birinshilikterinen – 212 altyn, 207 kúmis, 223 qola, Azııa chempıonattarynan – 3 altyn, 6 kúmis, 1 qola, álem chempıonattarynan 4 altyn buıyrdy. Qalamyzda 1 Qazaqstanǵa eńbegi sińgen jattyqtyrýshy, 8 halyqaralyq sport sheberi, 17 Qazaqstannyń sport sheberi, 307 sport sheberligine úmitker balalar men jasóspirimderdi sportqa jattyqtyrady. Shymkenttik 1 284 sportshy ulttyq qurama sapynda óner kórsetedi. Bıylǵy maqsatymyz – VI Jastar oıyndaryna qatysý. Munda Shymkent komandasy basty favorıt sanalady. Sondaı-aq kelesi jyly qysqy Olımpıadadan júlde alsaq degen oıymyz bar. Frıstaıl akrobatıka saıysy boıynsha úmitkerimiz de joq emes. Odan bólek, kelesi jyly ótetin HH jazǵy Azııa oıyndaryna daıyndyqty qazirden bastap kettik. Jalpy, Shymkent qalasynda sporttyń damýyna memleket tarapynan barlyq jaǵdaı jasalyp otyr. Eń bastysy, sporttyq ınfraqurylym men joǵary sport sheberligin shyńdaý arqyly megapolıs órenderi halyqaralyq arenalarda tabysty óner kórsetip keledi», dedi E.Dármenov.
