Zııatkerlik báıgeniń jeńimpazdary

Jas fızıkter

Ulttyq qurama jaqynda Fransııanyń Palezo qala­synda ótken IPhO-2025 halyq­aralyq fızıka olımpıadasynda bes medal jeńip aldy.

Bıylǵy saıysqa 90 elden 400-den astam daryndy oqýshy qatysqan. Jas fızıkterimiz bul joly da úzdikter qatarynan kórinip, eki kúmis, úsh qola medaldy oljalap qaıtty. Tarqatyp aıtsaq, Astana qalasyndaǵy Nazarbaev zııatkerlik mek­tebiniń 11-synyp oqýshysy Ámirbek Azatbekov pen Al­maty qalasyndaǵy Nazarbaev zııat­kerlik mekte­biniń 12-synyp oqýshysy Beka­syl Elý­baı ekinshi oryn alsa, Astana qalasyndaǵy «Spectrum» halyqaralyq mekte­biniń 12-synyp oqý­shysy Ámir Pishenbaev, Asta­na qala­syn­daǵy Nurorda mek­tep-lı­seıiniń 10-synyp oq­ý­shy­sy Nurgúl Egenber­genova jáne Astana qalasyn­daǵy «Spectrum» halyqaralyq mekte­biniń 12-synyp oqýshysy Artýr Kım úshinshi orynnyń tuǵy­rynan kórindi.

Komandanyń ǵylymı jetekshileri – PhD doktory, Sýleıman Demırel ýnıversıtetiniń assıstent-professory Samat Maqsu­tov jáne halyqaralyq olım­pıadalardyń júldegeri Alısher Erkebaev.

Aıta keteıik, fızıkadan halyqaralyq olımpıada 1967 jyldan beri ótkiziledi jáne bul saıys álemdegi eń bedeldi pándik jarystardyń biri sanalady. Al ulttyq qurama IPhO olımpıadasyna 1997 jyl­dan beri turaqty qatysyp keledi.

Matematıka myqtylary

Aýstralııada ótken IMO-2025 halyqaralyq matematıka olımpıadasynda Qazaqstan quramasynyń qorjyny taǵy alty medalmen tolyqty. Jyl saıyn dástúrli túrde uıymdastyrylatyn bul bilim báıgesine bıyl 112 elden 650-ge jýyq úzdik jas matematık qatysyp, baq sy­naǵan. El namysyn qor­ǵaǵan oqýshylarymyz tórt kúmis, eki qola medalǵa qol jetkizip, úzdikter qatarynan kórindi. Bul – úlken jetistik.

Halyqaralyq IMO olımpıadasyna Qazaqstan qurama komandasy alǵash ret 1993 jyly qatysty. Sodan beri júlde qorjynymyz 16 altyn, 55 kúmis, 81 qola medalmen tolyqty. Al bıyl­ǵy nátıjege keler bolsaq, Almaty qalasyndaǵy «Hai­ley­bury Almaty» mek­te­bi­niń oqýshylary 11-synyp oqý­shysy Amırlan Aman­jo­lov pen 12-synyp oqýshysy Mıron Iýrkevıch, Astana qalasyndaǵy «Spec­trum International School» mektebiniń 11-synyp oqý­shysy Marǵulan Sharel, Almaty qalasyndaǵy RFMM mektebiniń 11-synyp oqýshysy Amır Sahıpov kúmis medalǵa ıe bolsa, Aqtóbe oblysyndaǵy «Bilim-ınnovasııa» lıseı-ınternatynyń 11-synyp oqýshysy Erqanat Kenshilik pen Almaty qalasyndaǵy Nurorda mektebiniń 10-synyp oqýshysy Erasyl Altynbek qola medalǵa qol jetkizdi. Olarǵa jetekshilik etken — PhD doktory Asylbek Isahov pen halyqaralyq olım­pıa­dalardyń jeńimpazy Qanat Satylhanov.

Úzdik bıologter

Qazaqstan quramasy Fı­lıp­pınde ótken IBO-2025 Halyqaralyq bıologııa olımpıadasynda táýir nátıje kór­setip, tórt qola medaldy qanjyǵaǵa baılady.

Osyndaı úzdik nátıje kór­setken Qazaqstan koman­dasynyń quramynda Pav­lodar oblysyndaǵy «Bilim-ınnovasııa» lıseı-ınter­natynyń 10-synyp oqýshysy Ersultan Qaıyrken, О́ske­men qalasyndaǵy Nazarbaev zııatkerlik mektebiniń 11-synyp oqýshysy Batyr Er­januly, Astana qalasyn­daǵy Nazarbaev zııatkerlik mektebiniń 12-synyp oqýshysy Aıǵanym Baltasheva, Al­maty qalasyndaǵy «Bilim-ınnovasııa» lıseı-ınter­natynyń 8-synyp oqýshysy Alıhan Ashyrhanov bar. Komandanyń ǵylymı jetek­shileri – otandyq ǵylymdy belsendi damytyp júrgen jas bıolog-ǵalymdar Leıla Asqarova men Ilıas Sakımov.

Aıta keteıik, bıyl bul bilim dodasyna 80 elden 320-dan astam daryndy jas qatysty. Jalpy, IBO-2025 olımpıa­dasy eki kezeńnen turady. Alǵashqy teorııalyq bólimde oqýshylar molekýlalyq jáne jasýshalyq bıologııa, genetıka, ekologııa, evolıýsııa jáne bıojúıeleý boıynsha kúrdeli esepterdi sheshedi. Al praktıkalyq kezeńde zert­hanalyq jumystarmen aınalysyp, bıologııalyq úderis­terdi taldaıdy.

Ulttyq qurama 1994 jyldan beri IBO olımpıadasyna qatysyp keledi. Osy ýaqyt ishinde ozat oqýshylarymyz 2 altyn, 18 kúmis jáne 56 qola medal, sondaı-aq 12 qurmet gramotasyn jeńip aldy. Eske sala keteıik, 2024 jyly bul olımpıada Astana qalasynda uıymdastyryldy.

Daryndy oqýshylardy, olardyń ustazdary men ata-ana­laryn osy jarqyn jeńis­pen quttyqtaımyz!