Sýret: sputnik.kz
Memleket basshysy aldymen «YDA Holding» basqarma tóraǵasy Hýseın Arslandy qabyldady.
Qasym-Jomart Toqaevqa «YDA Holding» kompanııasynyń Qazaqstanda iske asyrylyp jatqan ınvestısııalyq jobalary jóninde málimet berildi. Atap aıtqanda, túrkııalyq holdıng Túrkistan, Astana jáne Petropavl qalalarynda kópbeıindi aýrýhanalar salý jáne paıdalaný boıynsha úsh jobany qolǵa alǵan. Kompanııa aldaǵy ýaqytta Astanadaǵy «YDA Industrial Park» kópsalaly óndiris keshenin keńeıtip, sendvıch-panelder shyǵaratyn zaýyt salýdy bastaıdy.
Sonymen qatar Hýseın Arslan kompanııanyń Aqtaýda mýltımodaldi tranzıt habyn qurýǵa qatysty josparymen bólisti.
Memleket basshysy holdıngtiń Qazaqstanǵa strategııalyq turǵydan qyzyǵýshylyǵyn jáne elimizde júzege asyryp jatqan ınvestısııalyq bastamalaryn joǵary baǵalady.
* * *
Odan soń Qasym-Jomart Toqaev «S Sistem Lojistik» kompanııasynyń basqarma tóraǵasy Hýseın Barlındi qabyldady. Kezdesý barysynda kompanııamen logıstıka salasynda ózara tıimdi ári uzaqmerzimdi seriktestik ornatý perspektıvasy talqylandy.
Memleket basshysy elimizdi Eýrazııadaǵy jetekshi tranzıttik habqa aınaldyrý úshin Orta dálizdi jan-jaqty damytý jumystary bastalǵanyn jetkizdi. Bul rette Qasym-Jomart Toqaev «S Sistem Lojistik» kompanııasynyń Aqtóbe halyqaralyq áýejaıynda logıstıka ortalyǵyn qurý bastamasyna qoldaý bildirdi. Joba «Qazposhta» aksıonerlik qoǵamymen birge júzege asyrylady.
Hýseın Barlın joba aıasynda atqarylyp jatqan jumystar týraly baıandady. Sondaı-aq kompanııanyń aldaǵy ýaqytta Astana, Almaty, Shymkent jáne Aqtaý qalalarynda da logıstıka ortalyǵyn keńeıtýdi josparlap otyrǵanyn jetkizdi.
Qasym-Jomart Toqaevtyń aıtýynsha, logıstıka ınfraqurylymyn keshendi túrde damytý óte mańyzdy. Munyń bári tranzıt ýaqytyn qysqartýǵa jáne eksport ınfraqurylymyn jaqsartýǵa múmkindik beredi.
«S Sistem Lojistik» – Túrkııanyń logıstıka sektoryndaǵy jetekshi ınnovasııalyq uıym. Kompanııa Ystanbul, Ankara, Izmır jáne Antalıa áýejaılarynda, sondaı-aq basqa da jerlerde jalpy aýmaǵy 100 myń sharshy metr qoıma jelisin basqarady.
* * *
Sonymen qatar Memleket basshysy «Tiryaki Holding» kompanııasynyń atqarýshy dırektory Súleımen Tırıakıoǵlyny qabyldady. Kezdesýde Prezıdent Qasym-Jomart Toqaev pen «Tiryaki Holding» kompanııasynyń atqarýshy dırektory Súleımen Tırıakıoǵly agroónerkásip kesheni baǵytyndaǵy ózara tıimdi jáne uzaqmerzimdi seriktestik máselesin talqylady.
Memleket basshysy kompanııanyń Astana qalasynan bıdaı men burshaqty tereń óńdeý zaýytyn salý týraly sheshimine qoldaý bildirdi.
О́z kezeginde Súleımen Tırıakıoǵly atalǵan joba elimizdiń qaıta óńdeý ónerkásibin damytýǵa, zamanaýı tehnologııalardy engizýge jáne jergilikti mamandardyń biliktiligin arttyrýǵa yqpal etetinin aıtty.
Kezdesýde Qazaqstannyń aýyl sharýashylyǵy ónimderin tasymaldaý úshin logıstıkany tıimdi uıymdastyrý, qoıma ınfraqurylymyn sıfrlandyrý jáne elevatorlardy jańǵyrtý máseleleri qaraldy.
«Tiryaki Holding» – dándi, maıly daqyldar, jem-shóp óndirý jáne eksporttaý boıynsha álemdegi kóshbasshy kompanııalardyń biri.
* * *
Memleket basshysy «Orzax Group» basqarma tóraǵasy Selman Alımoǵlyny qabyldady. Álemdegi bıologııalyq belsendi qospalar naryǵynda kóshbasshylardyń biri sanalatyn kompanııa basshylyǵymen kezdesýde birlesken jobalardy júzege asyrý máselesi qarastyryldy.
Qasym-Jomart Toqaev «Orzax Group» kompanııasynyń Túrkistan oblysynda bıologııalyq belsendi qospalar óndiretin zaýyt salý sheshimine qoldaý bildirip, bul bastama otandyq farmasevtıka salasyn ártaraptandyrýǵa jáne elimizdiń eksporttyq áleýetin arttyrýǵa eleýli úles qosatynyn atap ótti.
О́z kezeginde Selman Alımoǵly kompanııanyń Qazaqstanda óndiristik bazany keńeıtýmen ǵana shektelmeı, ǵylymı zertteý jáne ınnovasııa baǵyttaryn da damytýǵa nıetti ekenin jetkizdi.
Búgingi tańda «Orzax Group» bıologııalyq belsendi qospalardyń 150 túrin óndirip, álemniń 60 eline eksporttaıdy. Qazaqstandaǵy óndiris jobasyna kompanııa 40 mıllıon dollar ınvestısııa quıyp, 500 adamdy turaqty jumyspen qamtýdy josparlap otyr.
