Sýret: gov.kz
Senator Ernur Áıtkenov «Keleshek mektepteri» jobasy aıasynda salynyp jatqan jalpy bilim beretin mekteptiń qurylysymen tanysty. Ol Pavlodar qalasyndaǵy qarqyndy damyp kele jatqan «Dostyq» shaǵyn aýdanynda salynyp jatyr. Qazir jumystyń 80 paıyzǵa jýyǵy aıaqtaldy. Mektep jańa oqý jylynda paıdalanýǵa berilmek.
«Adamı kapıtaldyń negizi mektepte qalanady, azamattyq jaýapkershilik tárbıelenedi jáne bilim mádenıeti qalyptasady. «Keleshek mektepteri» oqý ınfraqurylymynda ýaqyttyń asa mańyzdy talabyna jaýap beretin jańa deńgeıdegi etalon bolatynyna senimdimin», dep atap ótti E.Áıtkenov.
Ǵımaratta zamanaýı oqý kabınetteri, zerthana men sheberhana, akt jáne sport zaldary, abattandyrylǵan aýla bar. Bilikti pedagogıkalyq quram jasaqtalyp, oqý synyptary jasalady.
Sondaı-aq Senat depýtattary Naýryzbaı Baıqadamov pen Rýslan Rústemov Qyzylorda oblysyna jumys sapary barysynda «Keleshek mektepterimen» tanysty. Qyzylorda qalasynda 1 500 oryndyq mektep qurylysy bastalǵan.
«Keleshek mektepteri» jobasy – jańa sapadaǵy mektep ınfraqurylymyn qalyptastyrý baǵytyndaǵy mańyzdy qadam. Zamanaýı, jaıly jáne tehnologııalyq mektepter balalardyń bilimi men damý ortalyǵyna aınalǵan. Sondyqtan qurylystyń ýaqtyly aıaqtalýyn ǵana emes, onyń joǵary standartqa sáıkestigin de qamtamasyz etý kerek», dedi N.Baıqadamov.
Buǵan qosa Qyzylordadaǵy agrarlyq sektorǵa orta býyn mamandar daıarlaıtyn agrotehnıkalyq kolledjde boldy. Munda jyl saıyn 140-tan asa túlek suranysqa ıe mamandyq ıesi atanyp, aýyldyq óńirlerdi bilikti kadrlarmen qamtamasyz etýge úles qosyp keledi.
«Memleket basshysynyń osy jyldy Jumysshy mamandyqtar jyly dep jarııalaýy tegin emes. Tájirıbesi bar bilikti mamandarǵa suranys artyp otyr. Jastar eńbek naryǵynda tabysty bolýy úshin kolledjderdi zamanaýı tehnıkalyq jabdyqpen qamtamasyz etip, sıfrlyq jáne ınnovasııalyq bilim berý standarttaryn engizý qajet. Jumysshy kadrlardy daıarlaý – memlekettiń strategııalyq basymdyǵynyń biri», dep atap ótti R.Rústemov.
Al depýtat Olga Býlavkına Shyǵys Qazaqstan oblysynyń Glýbokoe aýdanynda ótken Dala kúnine arnalǵan is-sharaǵa qatysty. Onda elıtalyq tuqymdar, keleshegi bar suryptar men býdandardyń, sondaı-aq zamanaýı agrotehnologııany qoldana otyryp ósirilgen jemis-jıdek daqyldary ónimderiniń kórmesi uıymdastyryldy. Qatysýshylar ósimdik sharýashylyǵy salasyndaǵy ǵylymı sońǵy jańalyqtarmen tanysyp, aýyl sharýashylyǵy daqyldarynyń ónimdiligi men turaqtylyǵyn arttyrý máseleleri boıynsha tájirıbe almasty.
«Parlamenttik baqylaý aıasynda agroónerkásip kesheni salasyndaǵy memlekettik baǵdarlamalardy iske asyrýdyń tıimdiligine erekshe nazar aýdaryp otyrmyz. Memleket aýyl sharýashylyǵy óndirýshilerin qoldaýǵa, otandyq sorttardy ilgeriletýge, ǵylymı bazany nyǵaıtýǵa jáne ınnovasııany engizýge kúsh salyp otyr. Aýyldyq jerlerdiń ornyqty damýy men ishki jáne syrtqy naryqtaǵy ónimniń básekege qabilettiligin arttyrý olardy iske asyrýǵa baılanysty», dep atap ótti senator.
Jalpy, elimizdiń agroónerkásip keshenin odan ári damytýǵa memleket, ǵylym jáne bıznes arasyndaǵy ózara is-qımyldy nyǵaıtý mańyzdy. Oǵan agrarlyq ǵylymdy damytyp, ınnovasııalyq sheshimderdi engizý qajet. Sondaı-aq aýyl sharýashylyǵy ónimin óndirýshilerdiń ǵylymı jetistikterge qol jetkizýin keńeıtip, agrarlyq sektorǵa memleket qoldaýyn arttyrý da nazardan tys qalmaýy kerek.
