О́SKEMEN. 17 aqpan. О́skemen qalasyndaǵy Nazarbaev zııatkerlik mektebiniń oqýshylary halyqaralyq ınternet qaýipsizdigi kúnin atap ótti. Bul týraly egemen.kz tilshisi habarlady.
Bul kúni oqýshylar onlaın-tehnologııany qoldanýdaǵy bilimderin jetildirip, áleýmettik jelilerdegi jaǵymsyz úrdisterden qorǵaný erejelerin úırendi.
Eýropalyq komıssııanyń 2004 jyly qabyldaǵan «Safer Internet Day» bastamasy jyl ótken saıyn ózektiligin dáleldeı túsýde. Bul – ásirese, búkilálemdik tordy belsendi paıdalanýshylar esebinde mektep jasyndaǵy balalar men jastar úshin mańyzdy bolyp otyr. Bıyl atalǵan aksııa «Barlyǵymyz birge oń ınternet jelisin quraıyq» degen uranmen ótip, álemniń 110 elin qamtydy.
Nazarbaev zııatkerlik mektebiniń baspasóz hatshysy Roza Qumarǵojınanyń aıtýynsha, bul is-sharanyń bastaýshysy – halyqaralyq muǵalimder. Iаǵnı halyqaralyq sanattaǵy muǵalimder stendterdi paıdalaný arqyly jáne qosymsha quraldarmen jeke sandyq qaýymdastyq músheleriniń áreketteri qoǵamǵa qandaı zııan ákeletinin túsindirdi. Oqýshylar vırtýaldy álemde kezdesken derbes akkaýnttardy buzý áreketterimen, áleýmettik jelini teris bet-beıne qalyptastyrýǵa paıdalanylatyn jazbalarmen tanysty. Sonymen qatar, muǵalimder ınternette jeke tulǵa qalyptastyrýdyń basqa da qyrlary, ınternettegi jaýapkershilikti arttyrý men minez-qulyq daǵdylary jóninde aıta kelip, oqýshylardyń dúnıetanymdaryna áser etetin qundy aqparattarmen bólisti.
Dýman Anash.
Derek: egemen.kz.
Sýret: О́skemen qalasyndaǵy Nazarbaev zııatkerlik mektebi.
