Reseı men Qytaı áskerı-teńiz kúshteri Japon (Shyǵys Koreıa) teńizinde birlesken jattyǵý ótkizip jatyr.Áskerı oqý-jattyǵý buryn josparlanǵanymen, AQSh prezıdenti Donald Tramptyń eki atom súńgýir qaıyǵyn Reseıge jaqyn aımaqqa jiberý týraly málimdemesinen keıin erekshe nazarǵa ilikti
The Telegraph basylymynyń jazýynsha, 3 tamyzda bastalǵan jattyǵýlar úsh kúnge sozylady. Qytaı tarapynan tórt áskerı keme, sonyń ishinde basqarylatyn zymyrandary bar eki esmınes qatysyp jatyr. Ssenarıı boıynsha, shartty qarsylastyń súńgýir qaıyqtaryn joıý is-qımyldary pysyqtalady.
Reseı men Qytaı ózderiniń áskerı yntymaqtastyǵy qandaı da bir úshinshi elge baǵyttalmaǵanyn birneshe márte málimdegen. Biraq Japonııa bul jattyǵýlarǵa narazylyq bildirdi. Resmı Tokıo Pekın men Máskeý arasyndaǵy strategııalyq baılanystardyń nyǵaıýy Japonııanyń ulttyq qaýipsizdigine qater tóndiredi dep esepteıdi.
Buǵan deıin AQSh prezıdenti Donald Tramp pen Reseıdiń qaýipsizdik keńesi tóraǵasynyń orynbasary Dmıtrıı Medvedev áleýmettik jelide bir-birin aıyptaıtyn jazbalar jarııalaǵan. Medvedev AQSh Reseıge qarsy sanksııalardy kúsheıte beretin bolsa, onyń arty soǵysqa alyp kelýi múmin ekenin aıtyp eskertken. Tramp bul málimdemeni «arandatýshylyq» dep baǵalap, eki atom súńgýir qaıyǵyn Reseıge jaqyn aımaqqa jiberý týraly buıryq bergenin habarlaǵan. AQSh zańy boıynsha atom súńgir qaıyqtarynyń baǵyty men mekeni jarııalaýǵa jatpaıtyn, qupııa aqparat bolyp sanalady.
Buǵan qosa, Donald Tramp Reseı men Ýkraınany 8 tamyzǵa deıin beıbit kelisimge kelýge úndep, eskertý jasaǵan. Ol kelisimge kelmegen jaǵdaıda sanksııa kúsheıetinin aıtqan.
