Ǵylymnyń keleshegi

Memleket basshysy Qasym-Jomart Toqaevtyń: «Jas ǵalymdardy jan-jaqty qoldaý – memleket úshin basymdyqtyń biri bolýy qajet. Olar – bizdiń ıntellektýaldyq kapıtalymyzdyń negizi» degen sózi memlekettik saıasattyń ózegine aınal­dy. Búgingi tańda jas ǵalym­dardy jan-jaqty qoldaýǵa mán berilip otyr. Ǵylym komıtetinde ótken kezdesýde 2025 jylǵa arnalǵan basym baǵyttar aıqyndaldy. Atap aıtqanda, keńestiń ǵylym salasyndaǵy nor­ma­tıvtik-quqyqtyq bazany jetildirýge qatysýy, jastardyń ǵylymı bastamalaryn qoldaý jáne jas zertteýshilerdi ǵylymı úderisterge belsendi tartý máseleleri talqylandy. Kezdesý barysynda Ǵylym komıtetiniń tóraǵasy jas ǵalymdardyń ulttyq ǵy­lym­dy damytýdaǵy rólin erekshe atap ótti.

– Sizder ǵylymnyń bola­shaǵy ǵana emes, onyń búginine serpin berýshi kúshsizder. Sizderdiń boı­laryńyzda qýat, tyń kóz­qaras, batyl ıdeıalar men nátıjege umtylys sııaqty ózgeris engizýge qajetti nárseniń bári bar. Biz sizderdiń eńbekterińizdi joǵary baǵalaımyz jáne ár qadamdaryńyzǵa qol­daý kórsetýge daıyn­byz. Ǵylymdaǵy armanda­ryńyz­­dy iske asyrý úshin qajetti jaǵdaılardy jasaý – bizdiń ortaq maqsa­tymyz, – dedi ol.

Keńes jas ǵalymdar­dyń bastamalaryn usyna­tyn jáne ilgeriletetin tıimdi alańǵa aınalýdy kózdeıdi. Sonymen qatar ol ǵylymı jastar men memlekettik ınstıtýttar arasynda keri baılanys­ty qamtamasyz etýdiń mańyz­dy tetigi bol­maq. Ǵy­lym komıteti ashyq dıa­log pen syndar­ly yn­ty­maqtastyqqa daıyn eken­­digin bildirip, jas ǵa­lym­­dar­dy ǵylymı orta da­mýy­­na qatysty sheshim­der qa­byl­­daý úderisine bel­sen­di qa­tysýǵa shaqyrdy.

Aıta keteıik, 2023 jyl­dan bastap elimizde ǵylymı jobalar­dy qar­jylandyrý kólemi eki ese artty. Bólingen qara­jattyń 30 paıyzy tikeleı 40 jasqa deıingi jas zert­teýshilerdiń jobalaryn qoldaýǵa baǵyttalǵan. Bul óz kezeginde jastardyń ǵylymda turaqtap qalýy­na, ıdeıalaryn iske asyrýy­na múmkindik berip otyr.

Sondaı-aq úsh jyldyq granttar arqyly júzege asyrylatyn iri bastama «Jas ǵalym» baǵdarlamasy iske qosyldy. Onyń sheń­berinde jas zertteý­shi­lerge turaq­ty túrde qar­jylaı qol­daý kórseti­lip, ǵylymı zert­teýle­rin júıeli túrde jal­ǵas­tyrýǵa jaǵdaı jasalǵan.

Ǵylymı-zertteý ınstıtýttary men joǵary oqý oryndarynyń janynan jańa zerthanalar da ashylyp jatyr. Onda shetelde bilim alyp, tájirıbe jınap kelgen jas mamandardy tartýǵa basymdyq berilip otyr.