«Senimen bolashaq» qoǵamdyq uıymy oblystyq fılıalynyń basshysy, abaıtanýshy Janat Muhamedjanov «Abaı ǵıbratnamasy», jergilikti orystildi aqyn, Jazýshylar odaǵynyń múshesi Kırıll Fılonov«Slovo nazıdanııa», oblystyq tilderdi oqytý ortalyǵy basshysynyń orynbasary Oral Janatov «Abaıdyń tolyq adam ilimi», Abaı atyndaǵy Qazaq ulttyq pedagogıkalyq ýnıversıtetiniń kafedra meńgerýshisi Zarına Qanafına «Abaıdyń grek tilindegi óleńderi» atty baıandamalar jasady. Jergilikti aqyndar óleńderin oqyp, ánshiler Abaıdyń ánderin oryndady.
2014 jyly sáýir aıynda jol túsip, uly Abaıdyń elinde bolǵan edik. Sonda jergilikti abaıtanýshy, aqynnyń ómir jolyn uzaq jyl zerttegen Áset Myrzaqasym aǵamyz «Abaıdyń ádebı hatshysy» degen shaǵyn tırajben shyqqan jınaǵyn syılaǵan. Soǵan jáne basqa derekkózderge súıenip, Abaıdyń asyl sózderiniń alǵash baspa betin kórgeni týraly toqtaldyq.
Ataqty abaıtanýshy ǵalym Mekemtas Myrzahmetov «Abaıdyń tuńǵysh óleń jınaǵynda aqynnyń óz óleńiniń sany – 97, joly – 3362 bolsa, aýdarma óleńder sany – 42, joly – 1372. Eki poemasynyń óleń joly 292-ge jetti. Iаǵnı 1909 jylǵy tuńǵysh jınaqtaǵy óleń jolynyń jıyntyǵy – 5326 bolyp, halqymyzdyń máńgi tozbas qazyna kózine aınaldy», dep eske alady.
Osyndaı derekter arqyly Abaıdyń 180 jyldyǵyn atap ótýge jınalǵan qyzyljarlyqtar aqyn shyǵarmasynyń jaryq kórýi týraly biraz maǵlumat alyp, marqaıyp qaldy.
PETROPAVL
