Mádenıet jáne aqparat mınıstrliginiń málimetine sáıkes, ózgerister nagradtaýǵa kandıdattardy qaraý kezinde ashyqtyqty, obektıvtilikti jáne ádildikti qamtamasyz etýge baǵyttalǵan. Nusqaýlyqtyń jańa redaksııasynda qujattardy resimdeý jáne kandıdattardyń eńbegin baǵalaý krıterıılerine qatysty negizgi erejeler naqtylandy.
Atap aıtqanda, nagradtaý qaǵazyn resimdeýge qoıylatyn talaptar tolyqtyryldy. Onda mindetti túrde eńbek joly, el men halyq aldyndaǵy naqty eńbekteri, sondaı-aq qylmystyq quqyqbuzýshylyqtar týraly málimetter olardyń jasalǵan ýaqytyna qaramastan kórsetiletin bolady. Jekelegen jaǵdaılarda ishki ister organdarynan minezdeme talap etiledi.
Sonymen qatar kópbalaly analardy nagradtaýǵa qoıylatyn talaptar retke keltirildi. Nagradtaý tek Qazaqstan Respýblıkasynyń azamaty bolyp tabylatyn kópbalaly analarǵa beriledi. Nagradtaý qaǵazyn resimdeý kezinde kópbalaly ananyń ózge memleket azamaty bolyp tabylatyn balalary pasporttarynyń kýálandyrylǵan kóshirmeleri jáne fotosýretteri qosa berilýi kerek.
Aıta ketý kerek, nusqaýlyqqa sáıkes memlekettik nagradalardyń kóshirmelerin (dýblıkattaryn) daıyndaý kezinde qymbat baǵaly metaldar qoldanylmaıdy.
Memlekettik nagradalarǵa quqyqty qalpyna keltirý múmkindigi ýákiletti organdardyń ótinishi boıynsha, sot aktilerin qosa alǵanda, rastaıtyn qujattar usynylǵan jaǵdaıda qamtamasyz etiledi.
Qabyldanǵan ózgerister nagradtaýǵa usyný rásimin retke keltirýge jáne memlekettik nagradalar ınstıtýtyna degen senimdi arttyrýǵa baǵyttalǵan.
