Qorǵanys mınıstrligi taratqan málimetin boıynsha, qazir bul jaǵdaıdy sheshý úshin sheteldik tarappen baılanys ornatylǵan. Qazaqstan azamatynyń quqyqtary men zańdy múddelerin qorǵaý boıynsha qajetti sharalar qabyldanyp jatyr.
Polshanyń arnaıy qyzmeti Qazaqstannyń Ýkraınadaǵy elshiliginde jumys istegen áskerı attasheniń kómekshisin (elshilikke nemese mıssııaǵa belgili bir maman retinde jiberiletin adam) tyńshylyq jasady degen kúdikpen ustaǵan. ABW (Polsha arnaıy qyzmeti) dereginshe, ol áskerı barlaý ofıseri bolyp, Polsha men onyń odaqtastaryna qarsy tyńshylyqpen aınalysqan.
Er adam 30 shildede Bydgosh qalasynda qamaýǵa alynyp, sot ony úsh aıǵa qamaý týraly sheshim shyǵardy. BAQ onyń esimin Anýar B. dep atady. Ol Qazaqstannyń Ýkraınadaǵy elshiliginde bir jarym jyl qyzmet etken.
Dıplomatııalyq ımmýnıteti tek Ýkraına aýmaǵynda ǵana kúshinde bolǵandyqtan, Polsha bıligi ony kedergisiz ustaǵan.
