Balýan Sholaq atyndaǵy sport jáne mádenıet saraıynda qorytyndylanǵan is-sharany 5 myńnan astam kórermen tamashalady. Onkúndik aıasynda uıymdastyrylǵan 10 iri joba shyǵarmashylyq, sport, bilim, volonterlik jáne ekologııa baǵyttaryn qamtydy. On kún ishinde kvest oıyndar, «Jastar Talks» motıvasııalyq kezdesýleri, ekologııalyq chellendjder, bı jarysy, jastar kórmesi jáne «Jaıdarman» oıyndary 30 myńnan astam armanshyl jasty bir alańda toǵystyra aldy.
«Bıylǵy «Alma love» onkúndigi – jastardyń áleýetin ashýǵa, shyǵarmashylyq ıdeıalaryn júzege asyrýǵa arnalǵan erekshe joba boldy. Biz 10 kún boıy túrli baǵyttaǵy is-sharalardy uıymdastyryp, jańa esimderdiń jarqyraýyna jol ashtyq. Bul – bir festıval aıasynda qala tarıhynda alǵash ret osyndaı aýqymdaǵy jobany júzege asyrýymyz. Jastar – Almatynyń damýy men jańarýyna serpin beretin kúsh. Biz olardyń bastamalaryn árdaıym qoldaýǵa daıynbyz», deıdi Almaty qalasy Jastar saıasaty basqarmasynyń basshysy Azız Qajdenbek.
Qaı eldiń de jarqyn bolashaǵy – jan-jaqty bilimdi, ushqyr oıly talantty jastar. Atalǵan jobanyń basty maqsaty ár saladaǵy daryndy jastardyń basyn qosyp, olardyń arman-maqsattaryna baspaldaq bolý deıdi uıymdastyrýshylar. Atalǵan jobany utymdy ıdeıasymen kózge túskender úshin óz armandaryn iske asyrýdyń taptyrmas múmkindigi dep ataýǵa bolady.
Grand fınalda Almatynyń damýyna túrli sala boıynsha úles qosqan jas kóshbasshylar men volonterlerge Almaty qalasynyń ákimi atynan alǵyshat tabystaldy. Olardyń qatarynda ekovolonter, «Proekt Vırýs» ekologııalyq bastamasynyń jetekshisi Dýlat Nábıev te bar.
«Jastardyń bastamasy – qoǵamnyń qozǵaýshy kúshi. Biz tabıǵatty qorǵap, ekologııalyq mádenıetti qalyptastyrý arqyly bolashaǵymyzǵa ınvestısııa quıyp otyrmyz. Bizge jasalǵan qoldaý – jas belsendilerdiń tabandy eńbeginiń nátıjesi», deıdi D.Nábıev.
Kesh barysynda Dosekesh, Qanaı, Erkesh Hasen, Qaırat Nurtas syndy otandyq estrada ánshileri óner kórsetti. Kórermenderge erekshe shoý baǵdarlamalar usynylyp, jas ónerpazdardyń qatysýymen órbigen sahnalyq qoıylymdar jyly áser syılady.
ALMATY
