Agenttiktiń málimetinshe, astanalyq departament qyzmetkerleri júrgizgen jedel is-shara barysynda kontrafaktilik ónim saqtalǵan bes qoıma anyqtaldy.
Tintý kezinde 490 myńnan astam veıp tárkilengen. Olardyń satylymynan túser zańsyz tabys kólemi 6 mlrd teńgeden asýy múmkin ekeni boljanyp otyr.
Sonymen qatar, kúdiktiler zańsyz tabysty jasyrý úshin «droperler», ıaǵnı banktik kartalary iri somalardy qolma-qol alýǵa rásimdelgen jalǵan tulǵalardy paıdalanyp, aqshany aınalymnan shyǵarý jáne onyń shyǵý tegin jasyrý tetigin uıymdastyrǵany belgili boldy.
Tergeý boljamyna sáıkes, uıymdastyrýshy zańsyz tabystyń bir bóligin shetelden kofe jetkizýge arnalǵan kelisimsharttar jasaýǵa jumsap, oǵan 92 mln teńgeden astam qarjy baǵyttaǵan.
Sot sheshimimen tyıym salynǵan ónimderdi tasymaldaýǵa paıdalanylǵan kólikke arest qoıyldy.
Uıymdastyrýshylar izdeýge jarııalanyp, bultartpaý sharasy retinde qamaýǵa alý taǵaıyndaldy.
QMA habarlaýynsha, tergeý áli de jalǵasyp jatyr. Qylmystyq-prosestik kodekstiń 201-babyna sáıkes, ózge málimetter jarııa etýge jatpaıdy.
