Erjan Toqtasynov alǵashynda áskerı qyzmette jumys istemeımin dep oılaǵan. Biraq taǵdyr joly qaıta-qaıta shekara qyzmetine alyp kelgen.
«Bir apaıymyzdyń óleń joldary bar edi «taǵdyr tartqan tabaqtan dám tatasyń, sen odan qutylmaısyń qashsań-daǵy» degen. Men ózimniń otan aldyndaǵy boryshymdy shekara qyzmetinde atqardym. Sodan bul áskerı qyzmet meniki emes dep sheshtim. Biraz ýaqyttan soń otbasylyq jaǵdaıdyń talabynan ba eken osy qyzmetke qaıtadan keldim. Bul meniń taǵdyrym ekenin túsindim. Áskerı emes qyzmet jasaımyn dep oılaǵanmyn. Artynan bul qyzmetti maǵan taǵdyrdyń ózi syılap turǵanyn túsindim», deıdi ol.
Onyń alǵashqy qadamdary Shyǵys Qazaqstan oblysyndaǵy Kúrshim basqarmasynan bastalǵan. Úsh jyl taýly aımaqtarda shekarany kúzetip shyńdalǵan maman 2017 jyldan beri Astanada qyzmetin jalǵastyryp keledi.
Efreıtordyń aıtýynsha, shekarashynyń jumysy tek qujat tekserýmen shektelmeıdi. Jolaýshylarmen suhbattasý, olardyń nıetin anyqtaý, kúdikti tulǵalardy tabý – barlyǵy erekshe qyraǵylyqty talap etedi.
«Árbir jolaýshymen sóılesip, suraqtar qoıý arqyly onyń shynaıy maqsatyn bilýge tyrysamyz. Psıhologııalyq ádisterdi de qoldanamyz. Sebebi bizdiń mindet – nıeti teris adamdardyń elge kirýine jol bermeý», deıdi efreıtor.
Onyń aıtýynsha, bul qyzmettiń eń qıyny – adamdarmen tikeleı jumys isteý. Árbir jolaýshynyń kóńiline qaraý, mádenıetti qarym-qatynas ornatý qajet. Sonymen qatar, zamanaýı qujattardy únemi meńgerip otyrýǵa da kóp kúsh jumsalady.
Erjan óziniń eń alǵashqy jumys kúnin, tipti eń alǵash tekseristen ótkizgen jolaýshysyn da esinde saqtap qalǵan eken.
«Eń alǵash teksergen jolaýshym dıplomat azamat boldy. Qujatpen jumys istep úlgermeı, uzaq ustap qalǵanym bar. Sol kisiniń eskertýi maǵan úlken sabaq boldy. Sodan bastap jyldam ári epti bolýǵa tyrystym. Sońynda Astana shekara baqylaý beketi - meniń ómirlik ıntıtýtyma aınaldy», dep eske alady ol.
Erjan Toqtasynov úshin áriptesteriniń orny bólek. Ol olardan kásibı sheberlikti, qujattardy tekserý ádisterin, tipti er azamatqa tán ustamdylyqty úırengenin aıtady.
«Qazir qujattar zamanyna saı damyp jatyr. Sondyqtan biz de jańa bilimdi úzdiksiz ıgerip otyrýymyz qajet. Ár eldiń qujaty ártúrli. Bir orynda turyp qalýǵa bolmaıdy», deıdi ol.
Efreıtor Toqtasynov jastardy da shekara qyzmetine qyzyǵýshylyqpen qaraýǵa shaqyrady.
«Jastardyń shekara qyzmetine qyzyǵýshylyǵyn arttyrý úshin biraz jumys jasaý kerek sııaqty. Sebebi, qazir kóbiniń sanasyna tez kóterilý, tez aqsha tabý degen sııaqty oılar kirip alǵan. Áıtse de osy qyzmetti jany qalaıtyn jastarymyz da joq emes. Biraq kóbi qarajatqa kelip tireledi. Qyzmetimizdi kásibı jaǵyn jastarǵa dáripteý kerek. Bir eldiń shekarasyn kúzetý, eldiń tynyshtyǵyn kúzetý degen úlken mártebe, abyroı. Sony memleket bolyp jas urpaqqa dáripteýimiz kerek», deıdi ol.
Áńgimesiniń sońynda keıipkerimiz áriptesterin merekemen quttyqtap, otanǵa degen jyly lebizin bildirdi.
«Tek 18 tamyz ǵana emes, árbir qyzmetke túsken kúnim men úshin meıramnan kem emes. Osy salada qyzmet istep júrgen áriptesterime sáttilik tileımin. Elimizdiń ishi daýdan, syrty jaýdan aman bolyp, shekaramyzdyń shebi tynysh bolsyn!», dedi keıipkerimiz.
