Jańa mamandyq – jarqyn múmkindik
Kópshilik florıstıka dese tek gúl shoqtaryn jınaý dep oılaıdy. Alaıda bul mamandyq – shyǵarmashylyq pen estetıkany, servıs pen qolónerdi, talǵam men jaýapkershilikti toǵystyrǵan sala. Astanadaǵy Servıs jáne týrızm kolledjinde osy baǵytqa alǵashqy stýdentter qabyldanyp, birqatar jas maman bilim alyp jatyr. Jańa oqý jylynan bastap olardyń qataryna taǵy 25 talapker qosylmaq. Aıta keterligi, onyń ishinde erekshe bilim berýdi qajet etetin stýdentter de bar.
Bolashaq florıster eki jyl on aı boıy tek teorııalyq bilim alyp qana qoımaı, zamanaýı zerthanalarda tájirıbe jınaqtaıdy. Oqý barysynda bıologııa, matematıka, qazaq jáne orys tilderi pánderinen alǵan bilim baǵalanyp, qosymsha suhbattasý júrgiziledi. Kolledjde arnaıy bilikti oqytýshylar dáris beredi, al stýdentter tájirıbeni sheteldik jáne otandyq seriktes kompanııalarda shyńdaıdy.
Erekshe óner ıesi
Kolledj shákirtterine Nıderlandtyq «Flower Circus» kompanııasy turaqty túrde sheberlik sabaqtaryn ótkizip keledi. Buǵan qosa, oqý orny «Romantic», «QazFlor» ortalyqtarymen jáne «Astana-Zelenstroı», «Jasyl aımaq» kásiporyndarymen tyǵyz baılanys ornatqan. Osy oqý ordasynyń bıylǵy túlegi Erjan Baltabaı búginde «Romantic» gúlder ortalyǵynda eńbek etip júr. Jas maman óz isine súıispenshilikpen qaraıdy:
«Florıstıka – tek gúldermen jumys emes, bul – aınalaǵa emosııa syılap, sulýlyqty jetkizý óneri. Iá, men bul mamandyqty jumys dep emes, óner dep túsinemin. Tabıǵat tamashalaryn úılestire otyryp, adamdarǵa qýanysh syılaǵym keledi», deıdi ol.
Halyqaralyq dodaǵa daıyndyq
Qazirgi tańda Erjan Baltabaı Danııada ótetin halyqaralyq «EuroSkills» jarysyna qyzý daıyndalap jatyr. Ár kúnin túrli tehnıkany meńgerip, kúrdeli kompozısııalar jasaýǵa arnaıdy. Ol baıqaýdyń respýblıkalyq kezeńinde el mádenıeti men tarıhyn tanytatyn erekshe jumystarymen daralandy.
Máselen, «Jibek joly», «Býrabaı», «Qozy Kórpesh-Baıan sulý» atty shyǵarmashylyq kompozısııalary ádilqazylar tarapynan joǵary baǵalanyp, jeńiske jetti.
«Florıstıka sheberlikti ǵana emes, sonymen birge úlken yjdaǵattylyq pen baıqampazdyqty talap etedi. Qazir eń bastysy – shyǵarmashylyq oılaý qabiletimdi jetildirý, óıtkeni halyqaralyq deńgeıdegi saıys tek tehnıkamen emes, ıdeıa tereńdigimen baǵalanady», deıdi jas florıst.
Gúl adamnyń nıetin sezedi
Erjan gúl dúkenine keletin adamdardyń bolmys-bitimi men minezi birden ańǵarylatynyn aıtady. Sózinshe, jaqyn adamyn rııasyz qýantqysy keletin adamnyń tapsyrysy óte tez jınalady ári jyldam úılese ketedi. Keıin sol gúldiń ǵumyry da uzaq bolady eken.
«Keı kisilerdiń gúlderi, kerisinshe, jınalmaı qoıady. Ondaı jandar gúldi qýantý úshin emes, «berip qutylý» úshin alady. Sheberlik mashyǵymyzdyń nátıjesinde ol tapsyrystyń dy qııýyn kelistirip, ádemi etip daıyndap beremiz. Biraq ondaı nıetpen alynǵan gúlder uzaq saqtalmaıdy. О́z tájirıbemde jıi kezdestirdim», deıdi florıst Erjan.
Gúl – tabıǵattyń názik tili. Al ony bizdiń tilde túsindiretin – Erjan Baltabaı. Onyń tabandylyǵy men talanty – otandyq florıstıkanyń bolashaǵy bar ekenin aıqyndaıdy. Álemdik saıystarda jas mamandarymyz qazaq jeriniń tabıǵaty men mádenıetin pash etse, bul tek bir mamandyqtyń ǵana emes, tutas eldiń mereıi bolary sózsiz.
