Oblys ákimi Beıbit Isabaevtyń aıtýynsha, sońǵy úsh jylda bilim salasyna bólingen qarjy kólemi aıtarlyqtaı ósip, oblys bıýdjetiniń 36%-yn quraǵan. Bul qarajat esebinen 232 aýyl mektebi jańartylyp, 20 jańa bilim nysany ashylǵan, 22 nysan kúrdeli jóndeýden ótken.
Konferensııa barysynda Memleket basshysy qoıǵan bes negizgi mindetti iske asyrýǵa nazar aýdaryldy. Atap aıtqanda, pedagogterdiń biliktiligin arttyrýdyń óńirlik baǵdarlamasyn ázirleý, mektepke deıingi jáne bastaýysh bilim arasyndaǵy sabaqtastyqty qamtamasyz etý, aýyl mektepteriniń áleýetin kóterý, tárbıe jumysyn júıeleý jáne sıfrlyq tehnologııalardy damytý máseleleri qaraldy.
Sonymen qatar, «Adal azamat» birtutas tárbıe baǵdarlamasy tanystyrylyp, oqýshylardy quqyq buzýshylyqtan qorǵaý, psıhologııalyq qoldaý kórsetý sharalary talqylandy. Bıyl 43 mektepke joǵary jyldamdyqty ınternet ornatylyp, 734 zamanaýı oqý kabıneti jabdyqtalǵan.
– Muǵalim eńbegi – bolashaqqa jasalǵan ınvestısııa. Ár sabaq, ár aıtylǵan jyly sóz – balanyń ómirin ózgerte alady. Sondyqtan bilim sapasyn arttyrý jolynda kúsh-jigerimizdi biriktirýimiz kerek, – dedi oblys ákimi.
Jıyn sońynda bilim berý salasynyń úzdik jobalary kórmesi uıymdastyrylyp, óńir pedagogtarynyń jetistikteri tanystyryldy. Aıta keteıik, búginde Jetisý oblysynda 15 myńnan astam muǵalim eńbek etedi, al sońǵy jyldary 243 oqýshy halyqaralyq jarystarda júldeli oryndarǵa ıe boldy.
