«Bárimiz biletindeı, qorǵanys salasyna jyl saıyn aıtarlyqtaı qarjy bólinedi. Biraq bul qarajat aldymen tehnıkaǵa, ǵımarattarǵa emes, áskerılerdiń áleýmettik jaǵdaıyn jaqsartýǵa jumsalýy kerek. Sebebi adamdar bolmasa, búkil tehnıka men ınfraqurylymnyń máni bolmaıdy. Áskerdiń aıbyny da, qýaty da eń aldymen adamda. Biz osyny uǵynýymyz qajet», – dedi depýtat.
Onyń sózinshe, basty basymdyq – áskerı qyzmetshilerdiń áleýmettik turaqtylyǵy men laıyqty eńbekaqysy. Bul shara olardyń qyzmetke adaldyǵyn arttyryp qana qoımaı, qazaq armııasynyń bedelin kóterýge múmkindik beredi.
Depýtattyń aıtýynsha, bul baǵytta naqty qadamdar jasalyp jatyr. 2024 jylǵy 4 qarashada Májilis qabyrǵasynda arnaıy zań jobasy usynylyp, ol 2025 jylǵy 1 shildeden bastap kúshine engen. Qujattyń basty maqsaty – turǵyn úı tólemderiniń ashyqtyǵyn qamtamasyz etý.
Buryn mundaı tólemder keı jaǵdaıda qolma-qol aqshaǵa aınalyp, tutynýshylyq nesıe jabýǵa nemese jeke shyǵyndarǵa jumsalǵan. Bul bıýdjet qarjysyn tıimsiz paıdalanýǵa ákelgen.
Jańa zańǵa sáıkes, turǵyn úı tólemderi tek úsh baǵytta qoldanylmaq:
- baspana satyp alý (sonyń ishinde bólip tóleý nemese ıpoteka arqyly);
- turǵyn úı jınaqtaryn tolyqtyrý;
- jaldaý aqysy.
Sonymen birge sharttardy Ádilet organdarynda tirkeý mindettelip, týystardan úı jaldaýǵa shekteý qoıylǵan.
Áleýmettik máseleler jáne sheshimder
Oljas Quspekovtiń saparlary kezinde áskerı qalashyqtar men shekara beketterinde turmys jaǵdaıynyń álsizdigi men jalaqynyń tómendigi basty másele ekeni anyqtalǵan.
«Áskerılerdiń basym bóligi turaqtylyq pen áleýmettik kepildikterdiń kúsheıýin kútedi. Qazirgi tıimsiz áleýmettik jeńildikter naqty shyǵyndardy jappaıdy, al keı qyzmetkerlerge múlde qoljetimsiz. Sondyqtan bul qarjyny bazalyq jalaqyny kóterýge baǵyttaý kerek», – dedi depýtat.
Onyń pikirinshe, tıimdi sheshimder qatarynda:
- artyq tólemderdi ıpotekany merziminen buryn jabýǵa paıdalaný;
- jalaqyny kezeń-kezeńimen kóterý;
- zeınetaqy tólemderin kúsheıtý bar.
«Tek turǵyn úı, jalaqy jáne áleýmettik paket qatar rettelse ǵana armııanyń qýaty artyp, áskerı qyzmetshi mamandyǵynyń ımıdji kóteriledi», – dep túıindedi Oljas Quspekov.
