Qyzyljar aýdanynyń týmasy, Keńes Odaǵynyń Batyry Fılıpp Chıjıkov soǵysqa 1942 jyly 19 jasynda alynǵan. Arnaıy áskerı daıyndyqtan ótip, 25-shi dıvızııaǵa qarasty 81-shi atqyshtar polki quramynda bólimshe komandıri bolyp taǵaıyndalǵan. Kishi leıtenanttar kýrsyn bitirgennen keıin atqyshtar vzvodyn basqarǵan. Belgorod, Harkov, Zvenıgorod, Býdapesht, Vena qalalaryn jaýdan azat etýge qatysqan. Qandy shaıqastardyń birinde aýyr jaralanǵanyna qaramastan, kórsetken qaharmandyq erlikteri úshin 1944 jyly Keńes Odaǵynyń Batyry ataǵy berilip, «Altyn Juldyz» belgisi men Lenın ordeni tapsyrylǵan.
Maıdannan oralǵan soń Qyzyljar óńiriniń ishki ister organdarynda uzaq jyl minsiz eńbek etken. Almaty mılısııa mektebin támamdap, jaýapty jumystar atqarǵan. Podpolkovnık shenine deıin kóterilgen. Qyzmet babymen Reseıge aýysyp, ómiriniń sońǵy kúnderin Voronej oblysynda ótkizgen.
Onyń qurmetine Berezovka aýylynda ornatylǵan obelıskiniń ashylý saltanatynda oblys ákiminiń birinshi orynbasary Aıdarbek Saparov, Ishki ister mınıstrligi ardagerler keńesiniń tóraǵasy, otstavkadaǵy general- maıor О́mirzaq Bolsambekov, kadrlar jumystary boıynsha departamenttiń basshysy, polkovnık Altynǵalı Ábdiǵalıev, Túmen oblysynan kelgen ishki ister qyzmetiniń ardageri Vladımır Boreskıı, taǵy basqalar sóılep, eskertkishke gúl shoqtaryn qoıdy. Marqumnyń Voronej qalasynda turatyn qyzy Nadejda Lesnyh Jeńistiń 70 jyldyǵy qarsańynda uıymdastyrylǵan aıtýly sharaǵa degen rızashylyǵyn, ákesiniń kózi jumylarda qabirimnen týǵan jerime bir ýys topyraq ala bar degen amanatyn oryndaǵanyn tolqyp jetkizdi.
Meımandar mektep janyndaǵy alańqaıda Jeńis alleıasynyń irgetasyn qalap, kóshetter otyrǵyzdy.
Búginde oblysta mektep, kóshe batyrdyń esimimen atalady.
О́mir ESQALI, «Egemen Qazaqstan».
Soltústik Qazaqstan oblysy, Qyzyljar aýdany.
