Sýretti túsirgen – Alekseı Popsov
Dál osy kúnderi jańa týrıstik nysannyń aldynda Almaty úshin arnaıy jasalǵan áıgili sýretshi Iınkı Shonıbareniń músini paıda boldy. Buǵan deıin bıyl mýzeı aldyna saltanatty túrde qoıylǵan Jaýme Plensanyń «Nades» músini jurttyń aıtarlyqtaı qyzyǵýshylyǵy men pikirtalasyn týdyrǵanyn bilemiz.
Brıtan-nıgerııalyq Iınka Shonıbareniń ózine kelsek, ol otarshyldyq pen bolmys taqyryptaryn zertteıtin qazirgi zamannyń eń tanymal sýretshileriniń biri. Onyń týyndylary álemniń áıgili murajaılarynda, atap aıtqanda Chıkagodaǵy «Art Institute of Chicago», Londondaǵy «British Museum», Parıjdegi «Centre Pompidou», Vashıngtondaǵy «Hirshhorn Museum», Nıý-Iorktegi «MoMA», San-Fransıskodaǵy «San Francisco Museum of Modern Art», Londondaǵy «Tate», Keıptaýndaǵy «Zeitz MOCAA» men basqa da murajaılarda tur.
«Almaty Museum of Arts» murajaıynyń basty kireberisine qoıylǵan Iınka Shonıbareniń músini ǵasyrlar boıy Atlant muhıty arqyly quldardy tasymaldaǵan jelkendi kemelerdi de eske salady. Osylaısha, «joqtan bar jasaýdy» murat tutqan músinshi jeldiń ózin qaǵazǵa túsirgisi keledi. Sýretshi óz sheberhanasynda mata men shash keptirgish arqyly eksperıment jasap, aýanyń lebi mataǵa soqqanda paıda bolatyn pishinderdi sýretke túsirgen. Almatyda qalatyn týyndy aýyr alıýmınııden jasalǵanyna qaramastan, músin jeńil ári aýada qalqyp turǵandaı áser qaldyrady.
Oraıy kelip turǵanda, «Almaty Museum of Arts» jobasyna toqtalatyn bolsaq, jańa mýzeıdiń irgetasynyń qalanýyna tanymal kásipker, mesenat ári otandyq kolleksıoner Nurlan Smaǵulov qory muryndyq bolyp otyrǵany belgili. Mýzeıge mesenattyń sońǵy otyz jyl boıy jınaǵan 700-den astam týyndydan turatyn sýret jádigerleri qoıylady. Onyń ishinde Qazaqstan men Ortalyq Azııanyń, sondaı-aq ataǵy jer jarǵan álemdik sýretshilerdiń kartınalary bar.
ALMATY
