Foto: Qazaqstan Respýblıkasynyń Konstıtýsııalyq Soty
Bul medal elimizdiń Ata zańynyń 30 jyldyǵyna oraı taǵaıyndalǵan. Sonymen qatar QR Konstıtýsııasynyń ústemdigin qamtamasyz etýge, el táýelsizdigin, qazaqstandyq qoǵamdaǵy kelisim men turaqtylyqty nyǵaıtýǵa, adamnyń jáne azamattyń konstıtýsııalyq quqyqtary men bostandyqtaryn qorǵaýǵa, konstıtýsıonalızm ıdeıalary men qaǵıdattaryn qalyptastyrýǵa jáne damytýǵa eleýli úles qosqan Qazaqstan Respýblıkasynyń azamattary men shetel azamattaryna beriledi.
«Konstıtýsııa – azamattardyń quqyqtary men bostandyqtarynyń negizgi kepili, táýelsizdik pen memlekettik bıliktiń sımvoly. Ata zańymyzdyń 30 jyldyǵyn atap ótý barysynda biz óz eńbegi arqyly Qazaqstanda jáne elimizden tys jerde zań ústemdigin nyǵaıtýǵa jáne demokratııalyq qundylyqtardy ilgeriletýge úles qosqan adamdardy qurmetteımiz», dedi Elvıra Azımova.
Marapattalǵandardyń qatarynda jetekshi quqyqtanýshy ǵalymdar, konstıtýsıonalıster, joǵary oqý oryndarynyń oqytýshylary, adam quqyqtary jáne kásipkerlerdiń quqyqtaryn qorǵaý jónindegi ombýdsmender, memlekettik organdar men kásibı zań qoǵamdastyǵynyń, sondaı-aq halyqaralyq uıymdardyń ókilderi bar.
Sondaı-aq, Memleket basshysynyń atynan mereıtoılyq medaldardy Konstıtýsııalyq Sot Tóraǵasynyń orynbasary Baqyt Nurmuhanov Maqsut Narikbayev University alańynda ótken konferensııanyń sessııasy barysynda, sondaı-aq Konstıtýsııalyq Sottyń sýdıasy Erkin Ońǵarbaev L.N.Gýmılev atyndaǵy Eýrazııa ulttyq ýnıversıtetiniń bazasynda ótken konferensııanyń sessııasy sheńberinde eńbek sińirgen adamdarǵa tabys etti.
