Oǵan mundaı jetistikke jetý birden ońaı bolǵan joq. Jyl basynda Italııada AQSh, Latyn Amerıkasy, Fransııa jáne basqa da elderdiń vokalısterin jınaǵan aýqymdy tyńdalym ótken edi. Sońǵy márede onymen birge ıtalııalyq úmitker qaldy. Alaıda mańyzdy sheshimdi komıssııa tóraǵasy, maestro, ataqty Mırella Frenıdiń jary Leone Madjera qabyldady. Ol bizdiń Álıhanǵa negizgi partııany senip tapsyryp, otandasymyzdyń biregeı vokaldyq talantyn erekshe baǵalady.
Operanyń qoıylymy aldaǵy qarashada bastalady. Odan keıin debıýttik spektaklder jeltoqsanda ótedi: eki kórsetilim Lýkkada usynylsa, taǵy ekeýi kelesi jyly qańtarda Ferrarada tanystyrylady. Rólge daıyndyq jumysy áldeqashan bastalǵan. Aldymen daıyndyq Mılanda ótip, odan keıin Bakýde jalǵasty. Bul jaqqa ánshi «Astana operanyń» teatr maýsymy aıaqtalysymen attanǵan bolatyn.
«Kez kelgen debıýtke daıyndyq – úlken jaýapkershilik. Astanadaǵy jáne Mılandaǵy professorlarymnyń arqasynda Italııadaǵy ózimniń ekinshi debıýtime muqııat daıyndalyp jatyrmyn. Dj.Rossınıdiń «Kúlbıke» operasyndaǵy Don Ramıro hanzadanyń partııasy – kúrdeli vokaldyq materıal. Onda vırtýoz koloratýralar men joǵary notalar kóp kezdesedi. Qazir teatrdaǵy jumysymnan bólek, barlyq bos ýaqytymdy osyǵan arnap otyrmyn. Bul opera tyńǵylyqty eńbekti talap etetin jáne tildiń kóptegen kúrdeli ıdıomalyq aınalymy kezdesetin naǵyz ıtalııalyq týyndy», dedi ol.
Daryndy jastyń ónerdegi aıaq alysy erekshe qýantady. Aıtalyq, kóktemde Sankt-Peterbordaǵy «Klassıka na Dvorsovoı» festıvaliniń tarıhyna enip, osy aıtýly sahnada óner kórsetken tuńǵysh qazaq ánshisi atandy. Sondaı-aq byltyr Florensııadaǵy «Maggio Musicale» teatrynda jáne Pezarodaǵy Dj.Rossını akademııasynda taǵylymdamadan ótken. Sol kezde ol áıgili Rossını festıvalinde «Reımske saıahat» operasynda debıýt jasady. Odan keıin oǵan Rýmynııadan shaqyrtý keldi. Sol jaqta ánshi býffa janrynyń álemdik sheberi, ıtalııalyq bas Brýno de Sımonemen birge «Sevıldik shashtaraz» operasyndaǵy graf Almavıvanyń partııasyn oryndady.
