Is-sharaǵa qala ákimdigi ókilderi, qalalyq máslıhat depýtattary, joǵary oqý oryndarynyń rektorlary men grant ıegerleri qatysty. Grant tabystaý jyl saıynǵy dástúrge aınalyp, elordalyq jastarǵa sapaly bilimge qol jetkizýge jol ashyp keledi. Bıylǵy is-shara aıasynda birqatar joǵary oqý oryndary men kolledjder óz granttaryn usynǵan. Atap aıtqanda, Turan-Astana ýnıversıteti – 8 grant, Sáken Seıfýllın atyndaǵy Qazaq agrotehnıkalyq zertteý ýnıversıteti – 1 grant, «Sınergııa» ýnıversıteti – 4 grant, Astana halyqaralyq ýnıversıteti – 3 grant, Maǵjan Jumabaı atyndaǵy joǵary kolledj 5 grant bólgen.
Saltanatty jıyn barysynda sóz alǵan Astana qalalyq máslıhaty tóraǵasy Tabıǵat Zeınulqabdenuly elorda jastarynyń áleýetin arttyrýdyń mańyzdylyǵyn atap ótti. Ol bilim granttarynyń tek materıaldyq qoldaý emes, sonymen qatar jastardyń ómirlik maqsatyna jetýge berilgen senim men múmkindik ekenin jetkizdi.
«Búgin biz dástúrge aınalǵan mańyzdy isti jalǵastyryp otyrmyz. Bıyl túrli ýnıversıtetter tarapynan 21 grant usynylyp otyr. Oǵan jeke joǵary oqý oryndary men mesenattar úlken qoldaý bildirdi. Ásirese áleýmettik turǵydan osal sanattaǵy jastarǵa, kópbalaly otbasylardyń balalaryna jáne qala ómirine belsendi aralasqan eriktilerge basymdyq berildi. Bul dástúr keıingi tórt-bes jyl kóleminde turaqty túrde jalǵasyp keledi. Bıylǵy granttarǵa Astana halyqaralyq ýnıversıteti, Sáken Seıfýllın atyndaǵy Qazaq agrotehnıkalyq zertteý ýnıversıteti, Maǵjan Jumabaı atyndaǵy joǵary kolledj ben «Sınergııa» jekemenshik joǵary oqý orny atsalysty. Grant ıegerleri ózderi qalaǵan mamandyq boıynsha bilim ala alady. Degenmen búginde tehnıkalyq jáne jumysshy mamandyqtaryna suranys joǵary. Sondyqtan jastardyń osy baǵyttardy tańdap, el damýyna qajetti ınjenerler men kásibı mamandar bolyp shyǵatynyna senim artamyz. Bizdiń basty tilegimiz – jastardyń bilimge qushtar bolyp, berilgen múmkindikti tolyq paıdalanyp, elge paıdasyn tıgizýi. Bul – olardyń armanyn júzege asyrýǵa berilgen múmkindik. Biz jastarǵa senemiz», dedi ol.
Astanada ótken bilim granttaryn tabystaý rásiminde Astana halyqaralyq ýnıversıtetiniń vıse-prezıdenti Qaırat Abdrahmanov oqý ornynyń jetistikteri men strategııalyq baǵyttary týraly aıtty.
«Biz nebári jeti jyl buryn qurylǵan jas ýnıversıtet bolsaq ta, búginde elordanyń eń iri pedagogıkalyq kadrlar daıarlaıtyn oqý oryndarynyń birine aınaldyq. Bıyl myńǵa jýyq bakalavr túlekterin ushyryp, olardyń basym bóligi elordanyń mektepterinde eńbek jolyn bastady. Ýnıversıtetimizdiń damý qarqyny Astananyń jalpy damýymen tikeleı baılanysty. Halyqaralyq baǵytqa basymdyq berip otyrmyz. Sheteldik ýnıversıtetterdiń fılıaldary ashyldy, Orta Azııadan talantty jastardy magıstratýraǵa tartý úshin granttar bólýdi bastadyq. Bul – elimizdi óńirdegi joǵary bilim ortalyǵyna aınaldyrýǵa baǵyttalǵan naqty qadam. Sonymen qatar biz Memleket basshysy Qasym-Jomart Toqaevtyń aımaqtyq deńgeıde joǵary bilimdi damytý jónindegi tapsyrmalaryn júzege asyryp kelemiz. Bizdiń maqsatymyz – elordamen birge damyp, jastarǵa sapaly bilim berip qana qoımaı, olardyń halyqaralyq deńgeıde bilim alýyna jol ashý», dedi Q.Abdrahmanov.
Grant ıegerleri talpynysynyń arqasynda bıik maqsattarǵa umtylyp júrgen jastar. Olardyń arasynda qoǵamdyq isterde belsendi eriktiler de bar. Jastardyń ortaq armany – sapaly bilim alyp, el damýyna qyzmet etý.
Sáken Seıfýllın atyndaǵy Qazaq agrotehnıkalyq zertteý ýnıversıtetiniń grantyn ıelengen Balaýsa Madııarqyzy qýanyshyn jasyrmady. «Bul grant – men úshin úlken múmkindik ári jańa ómirge bastar jol. Armanym – jaqsy maman bolyp, elimniń damýyna úles qosý. Búgin qolyma tıgen sertıfıkat tek qujat qana emes, meniń bolashaǵyma ashylǵan esik dep bilemin. Bizge senim artqan jandardyń úmitin aqtaýǵa tyrysamyz», dedi ol.
Saltanatty rásim sońynda grant ıegerlerine sertıfıkattar tabystalyp, olardyń ata-analary men ustazdaryna da alǵys aıtyldy. Jas býynnyń qýanyshty sátin bólisken qaýym jańa oqý jyly qarsańynda elordada osyndaı ıgi is-sharanyń ótkizilýin jastarǵa jasalǵan úlken qoldaý retinde baǵalady.
