Sýret: atr.kz
Oblys ákimi Serik Shápkenovtiń málimetine súıensek, renovasııa baǵdarlamasy aıasynda 9 mektepte kúrdeli jóndeý júrip jatyr. Onyń ishinde 5 mekteptegi jumys 1 qyrkúıekke deıin, al 3 bilim ordasyndaǵy jóndeý jyl sońyna taman aıaqtalady. Biraq bir mektepti jóndeý aldaǵy jyly da jalǵasady.
«Jańadan úsh «Keleshek mektepteri» ashyldy. Osy kezge deıin 298 pedagog biliktilikti arttyrý kýrsynan ótti. О́ńirdegi 25 mektep modernızasııadan ótkizilip, hımııa, fızıka, bıologııa, robottehnıka, STEM jáne basqa pánder úshin qosymsha modıfıkasııalyq úlgidegi 130 kabınet jabdyǵy satyp alyndy. 364 bilim berý mekemesi beınebaqylaý kamerasymen, týrnıketpen, lısenzııalanǵan kúzet jáne dabyl túımesimen jabdyqtaldy», deıdi Serik Shápkenov.
Qazir oblysta 20 mekteptiń qurylysy júrip jatyr. Bıyl 15 mektep paıdalanýǵa beriletini josparlanyp otyr. Bul bilim ordalarynda 13 200 oryn bar.
Munaıly shaharda 68 mektep bar. Qalalyq bilim bóliminiń basshysy Aınagúl Dúısekenovanyń málimetine qaraǵanda, shahar men oǵan irgeles ornalasqan eldi mekenderdegi 16 mektepti jańǵyrtý jumysy 2022–2023 oqý jylynda bastalǵan. Sonyń ishinde №44 mektep-gımnazııasy, B.Momyshuly atyndaǵy №25, F.Ońǵarsynova, M.Otaralıev, M.О́temisuly atyndaǵy jáne Erkinqala aýyldyq okrýgindegi orta mekteptiń synyp bólmeleri jańǵyrtylypty.
«Modernızasııalaýdaǵy basty maqsat – aýyl mektepterindegi pándik kabınetterdi zamanaýı qural-jabdyqtarmen qamtý, áleýmettik mańyzy bar nysandardy jańartý. Bilim ordalarynyń kitaphanasy, pándik jáne kompıýterlik synyptary, sport zaldary jańartylyp, paıdalanýǵa berildi», dedi A.Dúısekenova.
Inder aýdandyq bilim bóliminiń basshysy Oryntaı Dilmuqashevanyń deregine súıensek, osy kezge deıin 15 mektepte, 11 balabaqsha men 3 qosymsha bilim beretin nysanda jóndeý jumysy aıaqtalǵan. Al M.Sıranov atyndaǵy orta mektepte kúrdeli jóndeý jumystary bastalypty.
«Qazir 30 mektep jańa oqý jylyna tolyq daıyn tur. Bıyl aýdandaǵy bilim berý mekemelerindegi jylý qazandyqtaryn aýystyrý qajettiligi týyndaǵan joq», deıdi O.Dilmuqasheva.
Al Jylyoı aýdandyq bilim bólimi basshysynyń mindetin atqarýshy Gúljansara Tańatarovanyń dereginshe, munda jalpy orta bilim beretin 20 mektep, 24 balabaqsha, mektepten tys 4 mekeme, №2 pedagogıkalyq-psıhologııalyq túzetý kabıneti jumys isteıdi.
«Jańa oqý jylynda 825 synypta 18 816 oqýshy bilim alatyny josparlanyp otyr. Shaǵyn ortalyqta 200, al 58 mektepaldy daıarlyq synybynda 1 265 bala tárbıelenedi. 2025–2026 oqý jylynda 1-synypqa 1763 oqýshy qabyldandy», deıdi G. Tańatarova.
Bul aýdanda erekshe bilim berýdi qajet etetin 300-ge jýyq oqýshy tirkelgen. Olarǵa qoldaý kórsetý maqsatynda 7 mektepte arnaıy ınklıýzıvti bilim berý kabıneti ashylǵan. Bıyl «Samruk-Kazyna Trust» korporatıvtik qorynyń demeýshiligimen №7, №8, №16, №18 jáne №21 orta mektepteri KPI kabınetimen jabdyqtaý kózdelip otyr.
Reseımen shekaradaǵy Qurmanǵazy aýdanynyń oqýshylary 33 mektepte bilim alady. Aýdandyq bilim bóliminiń basshysy Edil Baıarovtyń aıtýynsha, onyń ishinde 27 orta, 3 negizgi, 3 bastaýysh bilim ordasy bar. Budan bólek, 5 qosymsha bilim berý mekemesi, №5 psıhologııalyq-pedagogıkalyq túzeý kabıneti jumys isteıdi.
«Aýdanda úsh aýysymdy jáne apatty jaǵdaıdaǵy mektepter joq. Jalpy orta bilim beretin 33 mekteptiń 7-eýi bir aýysymda, 26-sy eki aýysymda jumys isteıdi. Alaıda oqýshy ornyna tapshylyq bar. Osy máseleni sheshý maqsatynda «Keleshek mektepteri» ulttyq jobasy aıasynda Qurmanǵazy jáne Aqkól aýylynda 600 oryndyq 2 mekteptiń qurylysy júrip jatyr. Bul nysandardyń qurylysy jyl sońyna deıin aıaqtalady», deıdi Edil Baıarov.
Bilim ordalaryn qysqy maýsymǵa daıyndaý maqsatynda 20 elektr generatory satyp alynǵan. Eki mektepke avtonomdy modýldi qazandyq ornatylylyp jatyr.
«Bıyl 7 mektepte 28 oqý kabıneti (bıologııa, hımııa, STEM, AÁD, eńbek, ınklıýzıv, geografııa, matematıka, qazaq tili, bastaýysh, psıholog) ornatý tolyq aıaqtaldy. Endi bir bilim ordasyndaǵy jumysty qyrkúıekke deıin aıaqtaý kózdeldi. Aýdandaǵy 16 mekteptiń materıaldyq-tehnıkalyq bazasyn nyǵaıtý úshin 1 425 parta, 283 shkaf, 96 taqta satyp alyndy», deıdi E.Baıarov.
Atyraý oblysy
