Maqalada Memleket basshysy qazaq-qytaı qatynastarynyń tarıhı tamyryna toqtalyp, ǵasyrlar boıy jalǵasyp kele jatqan tatý kórshilik qarym-qatynastyń búgingi tańda jan-jaqty strategııalyq seriktestikke aınalǵanyn aıtty.
«Ǵasyrlardan tamyr tartatyn qazaq pen qytaıdyń tatý kórshilik qarym-qatynasy ózara senim, qoldaý men túsinistikke arqa súıeıdi. Búgingi tańda osynaý berik dostyq baılanystarymyz strategııalyq seriktestik pen memleketaralyq yntymaqtastyqtyń úlgisine aınaldy», – dedi Q.Toqaev.
Prezıdenttiń aıtýynsha, eki eldi beıbitshilik pen tatý kórshiliktiń sımvolyna aınalǵan 1700 shaqyrym ortaq shekara biriktiredi.
«Bul tek geografııalyq shekara emes, sonymen birge halyqtarymyzdyń arasyndaǵy senimniń, dostyqtyń jáne ózara túsinistiktiń nyshany», – dep atap ótti ol.
Maqalada Qytaı basshysy Sı Szınpınniń kóregen basshylyǵymen qol jetkizilgen tabystarǵa da toqtalyndy.
«Qytaı álemdik deńgeıdegi kórnekti saıasatker sanalatyn Tóraǵa Sı Szınpınniń salıqaly basshylyǵymen tańǵalarlyq tabystarǵa qol jetkizdi. Bul tabystar jaqyn kórshilerine, sonyń ishinde Qazaqstanǵa da jańa múmkindikter esigin aıqara ashty», – dep jazdy Toqaev.
Sondaı-aq Prezıdent qos eldiń qazirgi seriktestigi ýaqyt synynan ótkenin, al bolashaqta odan ári nyǵaıa túsetinine senim bildirdi.
«Bolashaǵynan kóp úmit kúttiretin jańa kezeńge qadam basqan kezde ýaqyt tezinen ótken seriktestigimizdiń qanshalyqty myqty ári tereń ekenin túısiný óte mańyzdy», – dedi Memleket basshysy.
Ol Qazaqstan men Qytaıdyń tek ekonomıkada ǵana emes, saıası jáne mádenı salalarda da baılanystary artyp otyrǵanyn atap ótti.
«Ortaq murat pen barlyq baǵyttaǵy yntymaqtastyqty keńeıtý arqyly sońǵy jyldary ózara yqpaldastyǵymyz erekshe qarqyn aldy. Bul – bizdiń elderimizdiń arasyndaǵy senimdi seriktestiktiń nátıjesi», – dedi Toqaev.
