«Múgedektigi bar adamdarǵa ómirlik mańyzy bar tehnıkalyq quraldar kontrafaktili, qoldanysta bolǵan, tozyǵy jetken kúıde usynylady. Al jańa ári sapaly ónim alý múmkindigi joqtyń qasy. Portal birte-birte «bazarǵa» aınaldy. Bul júıe azamattarǵa emes, deldaldarǵa qyzmet etip otyr», dedi depýtat.
Kenjeǵul Seıtjan naqty mysal retinde Anatolıı Mıgaıdyń jaǵdaıyn keltirdi. Ol áleýmettik portal arqyly qymbat oqý qurylǵysyn alǵanymen, taýar jalǵan ári buryn paıdalanylǵan bolyp shyqqan. Jetkizýshini portaldan alyp tastaýǵa ǵana shara qoldanylǵanymen, kináliler jazalanbaǵan, al múgedektigi bar azamattyń quqyǵy qorǵalmaǵan.
Sonymen qatar, depýtat sanıtarlyq-gıgıenalyq quraldardy jetkizý isinde de kóptegen zańbuzýshylyq bar ekenin atap ótti. Onyń aıtýynsha, memleket portal arqyly pampersterdi tegin taratqan sátten bastap, olardy qaıta satatyn habarlandyrýlar OLX sekildi platformalarda kóbeıip ketken.
«Qalyptasqan júıe kimniń múddesi úshin jasaldy? Múmkindigi shekteýli jandardyń múddesine saı kelmeıtini anyq! Nelikten erekshe qajettilikteri bar azamattar osy Portalda taýarlar men qyzmetterge tapsyrys berýi kerek, eger elimizde múmkindigi shekteýli jandarǵa arnalǵan taýarlardy shyǵaratyn birde-bir óndirýshi bolmasa, tek deldal satýshylar bar bolsa, kásibı daıarlyǵy men materıaldyq-tehnıkalyq bazasy tolyq bolmaǵan jaǵdaıda da kez kelgen adam qyzmet kórsetýshi bola alady. Nelikten memleket Portalǵa júktelgen fýnksııalardy oryndamasa, ony damytýǵa jáne qoldaýǵa aqsha jumsaýy kerek? Nelikten sapasyz taýarlar men qyzmetterge qarajat bólý kerek?» dedi depýtat.
Bul rette Halyq partııasynyń Fraksııasy kelesideı usynystar jasady:
- Ár óńirde múgedektigi bar azamattarǵa arnalǵan taýarlar men qyzmetterdiń kórme pavılondaryn ashý;
- Gıgıenalyq quraldardy tek arnaıy ortalyqtar arqyly jetkizý;
- Birqatar áleýmettik jeńildikterdi monetızasııalaý nemese vaýcherlik júıege kóshirý;
- Áleýmettik qyzmet kórsetý júıesine aýdıt júrgizip, sybaılas jemqorlyq shemalaryn anyqtaý, jaýapkershilikti kúsheıtý.
«Qazirgi júıe bıýdjet esebinen uıymdastyrylǵan lotereıaǵa aınaldy: jolyń bolsa – sapalysyn alasyń, bolmasa amal joq. Bul ádiletsizdikke núkte qoıý kerek», dep túıindedi Kenjeǵul Seıtjan.
