Buǵan deıin (1998 jyldyń 20 qańtarynan bastap) mereke 22 qyrkúıekte toılanyp kelgen. Al 2017 jylǵy «Qazaqstan Respýblıkasynda mereke kúnder tizbesin bekitý týraly» qaýlysyna sáıkes, ataýly kún 5 qyrkúıekke aýystyryldy. Merekeniń jańadan belgilený sebebi – «Ulttyń saqtalýyna da, joǵalýyna da sebep bolatyn nárseniń qýattysy – til» dep ulaǵatty sóz qaldyrǵan, qazaq halqynyń taǵdyry men tili úshin kúresken Alash arysy, ult ustazy Ahmet Baıtursynulynyń týǵan kúnimen baılanysty. Búgin barsha qazaqstandyq qazaq álipbıiniń negizin salǵan ǵalymnyń týǵan kúninde Tilder merekesin atap ótedi.
Qazaqstan – kópultty memleket. Qazirgi tańda elimizde 130-dan astam ult pen ulys ókilderi beıbit ómir súrip, eńbek etýde. Olar júzden astam tildi qoldanady. Memlekettik til – qazaq tili, sondaı-aq orys tili resmı túrde qoldanylady. Árbir etnostyń ana tilin, mádenıeti men dástúrin damytýyna jaǵdaı jasalǵan.
Tilder kúni – halyqtar arasyndaǵy dostyq pen birlikti dáripteıtin, eldiń basty qundylyqtarynyń biri – memlekettik tildiń mártebesin arttyrýǵa baǵyttalǵan mereke. Bul kúnniń basty maqsaty – Qazaqstandaǵy árbir azamattyń ana tilin qurmetteýge, memlekettik tildi damytýǵa, mádenıetaralyq túsinistik pen syılastyqty nyǵaıtýǵa shaqyrý.
Qazaqstan halqy tilderi kúni – el birliginiń, dostyq pen yntymaqtastyqtyń jarqyn kórinisi.
