Foto: Ashyq derekkóz
Jumysshy mamandyqtarynyń jyly aıasynda tehnıkalyq jáne kásiptik bilim berý salasy eńbek naryǵynyń talaptaryna saı qaıta jańǵyrtylyp jatyr. Osy turǵyda Jańa kásipter atlasy ázirlenip, onyń negizinde 900-den astam bilim berý baǵdarlamasy ózektendirildi, al 510-nan astam jańa baǵdarlama jasalǵan.
Sonymen qatar 9 óńirde kadrlarǵa qajettilik kartalary daıyndalǵan. Jumysshy mamandyqtarynyń bedelin arttyrý úshin Jas Skills jáne Junior Skills chempıonattary uıymdastyrylyp, 107 myńnan astam oqýshy «Mansap kompasy» platformasynda kásibı dıagnostıkadan ótti. Buǵan qosa, bes kolledjdi halyqaralyq deńgeıge kóterý baǵytynda naqty jumystar bastaldy.
Bilimniń qoljetimdiligin arttyrýdyń basty tetikteriniń biri – oqytýdy tikeleı qarjylandyrý. Prezıdenttiń tapsyrmasyna sáıkes, memlekettik granttardyń sany 50%-ǵa kóbeıtilip, bıylǵy oqý jylynda olardyń kólemi 93 myńnan asty. Budan bólek, jergilikti ákimdikter – 1,5 myńnan astam, KAZENERGY qaýymdastyǵy – 400, JOO rektorlary – 2,2 myń jáne «Qazaqstan» qory – 500 qosymsha grant bóldi.
Stýdentterdi áleýmettik qoldaý sharalary da júıeli túrde júrgizilip keledi. 2024 jyldyń qyrkúıeginen bastap shákirtaqy ósti: bakalavrlar úshin – 20%-ǵa, magıstranttar men doktoranttar úshin – 15%-ǵa, pedagogıka salasyndaǵy stýdentterdiń shákirtaqysy 75 myń teńgeden asty. Sońǵy bes jyl ishinde shákirtaqy kólemi eki ese artty. Aldaǵy maqsat – 2029 jylǵa qaraı onyń mólsherin taǵy da 200%-ǵa deıin kóterý.
Jastardy qoldaýdyń uzaqmerzimdi qarjylyq tetikteri de engizilip jatyr.
«Ulttyq qor – balalarǵa» baǵdarlamasy bastapqy kapıtaldy qalyptastyrýǵa kómektesedi, 2024 jyldyń qorytyndysy boıynsha balalardyń shottaryna $8 880 mln tústi. Memlekettiń qatysýymen júzege asatyn jańa «Keleshek» jınaqtaýshy júıesi (60 AEK bastapqy kapıtal jáne 7% deıingi syılyqaqy) ata-analarǵa bilim berýge josparly túrde 5 mln teńgeden astam qarajat jınaýǵa múmkindik beredi. Stýdent memlekettik grant alǵan jaǵdaıda, «Keleshek» baǵdarlamasy boıynsha jınaqtalǵan qarajat turǵyn úı satyp alýǵa baǵyttalýy múmkin», dedi Ǵylym jáne joǵary bilim mınıstri Saıasat Nurbek.
Oǵan qosa, memleket tarapynan jeńildetilgen bilim berý nesıeleri men 300 saralanǵan grant qarastyrylǵan. Bul granttar oqý aqysynyń 50%-yn nemese 75%-yn jabýǵa múmkindik beredi, al stýdent tolyq kólemde shákirtaqy alady.
Memleket basshysynyń tapsyrmasyna sáıkes, jyl saıyn stýdenttik jataqhanalarda keminde 10 myń oryn ashý mindeti qoıylǵan. 2018 jyldan beri 62 myń oryndyq 251 jańa jataqhana paıdalanýǵa berildi. Bıylǵy jyly 29 jataqhana ashylyp, olardyń jalpy syıymdylyǵy 10 myńnan asty. Sonyń ishinde el tarıhyndaǵy eń iri jataqhana – elordadaǵy Eýrazııa ulttyq ýnıversıtetine arnalǵan 2 656 oryndyq ǵımarat paıdalanýǵa berildi. Osylaısha stýdentterge arnalǵan jataqhana tapshylyǵy barlyq óńirde sheshimin tapty. Sonymen birge «Student-residence» zamanaýı úlgisi engizilip, áleýmettik osal toptaǵy stýdentterdiń jataqhanada turý shyǵyndary 2023 jyldan bastap memleket esebinen ótelip otyr.
