Foto: dooralei.ru
Byltyr elimizdiń terrıtorııasy arqyly júk tasymaldaý kólemi 1 mıllıard tonnadan asqan. Q.Toqaev bul kórsetkishti áli de arttyrýǵa zor múmkindik baryn atap ótti.
«Sonymen birge elimizdiń tranzıttik áleýetin arttyrýǵa áli de zor múmkindik bar. «Soltústik – Ońtústik» kólik dálizi Parsy shyǵanaǵy men Ońtústik Azııa elderiniń naryǵyna tikeleı jol ashady. Al «Shyǵys – Batys» dálizi men Qytaıdyń «Bir beldeý, Bir jol» jahandyq bastamasy Qazaqstannyń Eýrazııadaǵy negizgi qurlyq joly retindegi rólin kúsheıte túsedi.
Sondaı-aq biz úshin Transkaspıı kólik baǵytyn damytýdyń mańyzy arta bastady. Bul baǵyttardyń bári birtutas júıe sııaqty jumys istep, elimizge edáýir tabys ákelýi kerek. Sondaı-aq ınfraqurylymdy jaqsartýǵa jańa ınvestısııa tartýy qajet, sapaly jumys oryndaryn ashýǵa yqpal etýge tıis. Osy oraıda, sıfrlyq tásilderdi aýqymdy túrde qoldanǵan abzal. Onsyz eshqandaı tıimdilik bolmaıdy», dedi Memleket basshysy.
Prezıdent álemde tranzıt úshin báseke kúsheıip bara jatqanyna da nazar aýdardy. Bul baǵytta arzan balama baǵyttar men joldar usynylyp jatqanyn eskergen Q.Toqaev jaýapty organdarǵa aldyn ala áreket etýdi, bir qadam alda bolýdy tapsyrdy.
«Taǵy da qaıtalap aıtarym, ınfraqurylymdy jańǵyrtý isin odan ári jalǵastyryp, osy saladaǵy ozyq el bolý úshin sıfrlandyrý men jasandy ıntellektini keń aýqymda paıdalanǵan jón. Bıyl uzyndyǵy – 836 shaqyrym bolatyn «Dostyq – Moıynty» temir jolynyń ekinshi jelisi iske qosylady. Jobany óz kúshimizben óte qysqa merzim ishinde júzege asyrdyq. Bul joldyń mán-mańyzy erekshe, sebebi «Shyǵys-Batys» baǵytynyń júk ótkizý múmkindigin aıtarlyqtaı arttyrady. Biraq munymen toqtap qalýǵa bolmaıdy. Úkimet «Baqty-Aıagóz», «Qyzyljar-Moıynty» jobalaryn ýaqytyly júzege asyrýǵa tıis. Sebebi, atalǵan jobalar elimizdegi temirjol júıesiniń tolyq qańqasyn qalyptastyrady», dedi Prezıdent.
