Prezıdenttiń aıtýynsha, el ishinde jolaýshylar tasymalyna qatysty máseleler sheshimin tabýy qajet.
«Jurttyń vagondardyń jaı-kúıine kóńili tolmaıdy. Astanada vagon qurastyratyn zaýyt iske qosyldy. Bul osy saladaǵy ózekti máselelerdi sheshý úshin jasalǵan mańyzdy qadam boldy. Ozyq halyqaralyq standartqa saı jabdyqtalǵan zamanaýı jolaýshylar vagonyn jasaý shetel ınvestorynyń qatysýymen qolǵa alynady», – dedi Qasym-Jomart Toqaev.
Memleket basshysy avıasııa ınfraqurylymyn jańǵyrtý isine de toqtaldy. Sońǵy jyldary Almaty, Shymkent jáne Qyzylorda qalalarynda jańa termınaldar ashyldy. Jaqynda Zaısanda, Qatonqaraǵaı men Kendirlide áýejaı qurylysy aıaqtalady. Arqalyq áýejaıy qaıta jóndelip jatyr.
Bul jobalar óńirlerdiń ekonomıkalyq belsendiligin arttyryp, jańa jumys oryndaryn ashýǵa jáne birqatar salanyń damýyna yqpal etedi.
Taǵy bir mańyzdy másele – áýemen júk tasymaly. Prezıdent buǵan erekshe nazar aýdarýdy tapsyrdy.
«Men buǵan deıin áýemen tasymaldanatyn júk kólemin eki ese ulǵaıtý jóninde tapsyrma berdim. Buǵan birinshi kezekte, sheteldiń iri ınvestorlaryn tarta otyryp, Ulttyq júk tasymaldaýshy kompanııa qurý arqyly qol jetkizýge bolady», – dedi Memleket basshysy.
Qasym-Jomart Toqaev elektrondy saýdanyń damýyna baılanysty áýe júk tasymalyna suranys artqanyn, bul sala asa tabysty baǵyt ekenin atap ótti. Sondyqtan áýe habtaryn damytý, olardy jahandyq logıstıka tizbegine kiriktirý qajettigin aıtty.
Sonymen qatar Prezıdent ekspress-júk tasymalyn retke keltirý, jańa tehnologııalardy – pılotsyz júk kólikteri men drondardy qoldanysqa engizý úshin tıisti quqyqtyq baza ázirleýdi tapsyrdy.
«Jalpy, men buǵan deıin birneshe ret aıttym: Qazaqstan Eýrazııadaǵy kólik haby bolýǵa tıis. Bul – strategııalyq mańyzy zor mindet. Bul jumysqa osy salada tabysqa jetken úzdik mamandar men kásipkerlerdi tartý kerek. Biraq, negizgi jaýapkershilik – Úkimette. Tapsyrmanyń oryndalý barysyn jyldyń basynda Úkimettiń jyldyq esebinen keıin arnaıy jınalysta qaraımyz», – dedi Prezıdent.
